الجمعة، 21 مايو 2010

انهارده فرحي يا جدعان

ايوة انهارده فرحي يا جدعان
ياخلق ...يا هوووووووووو
انهارده انا هودع العزوبيه
ان شاء الله
سعيده اني اتعرفت علي المدونات والمدونين
ومن اليوم انا في اجازة لحين اشعار اخر
وعقبال كل البنات وكل البنين اما نفرح بيكم كلكو ان شاء الله
بجد هتوحشني المدونه والمدونات المجاورة
ومن موقعي هذا بقول
خلو بالكو من نفسكو وزي الدرش ما قال
لو كنت غالي عليك
خد بالك من روحك بعدي
سلالالالالالالالالالالالالالالالام د
وصف الاحساس
تحياتي

الثلاثاء، 18 مايو 2010

غاليه يا ابتسامه


غاليه اوي يا ابتسامه
بتيجي في ساعات وتموتي في ثواني
بتاخديني لدنيا غير الدنيا
اعيش وياك في عالم تاني
وافوق علي الم والاقيكي مش معايا
معرفش الحزن حكايتي ولا بس ناداني
بتاخدني الايام وتجري و وانا روحي معاكي
بدور جوايا عنك وبردو تتوهي عن بالي
ايام وسنين بتفوت وانتي الامل بس في سكوت
و بداري جوا القلب دموع بتحرق عيني من غير صوت
واعيش علي امل انك ليا
وانا معرف ايه ال وراكي مخبيه
يمكن تكوني بتلعبي بيا
وبس بتفرحي قلبي شويه شويه
وفي لحظة تاخدي منه الحيويه
وترميه بيدور من تاني علي حنيه
تعبتيني بس تستاهل الحكايه
اهي لحظة بتعدي من الايام
بين لحظات مليانه جرح وتعب والام
مش لازم تستني معايا
بس خلاص قلبي مل الحكايه
عايزة تروحي روحي مش هترجي
ولا هداري الدمع في قلبي وانسي
اهي عيشه ماشيه والسلام
كتر خيرك انتي والايام
عرفتو تلعبو صح علي الاحلام
كل حلم اتحول كلام 
ولحظة ندم علي عمر فات 
خلاص اهي ماشيه الحياه
وزي ما ترسي وزي ما تجيب الايام 
وصف الاحساس 
تحياتي 

الأحد، 16 مايو 2010

حيرة مش وقتها


الحيرة دي مش وقتها

ياريت قلبي قادر يصدها
بيسالني ايه غيرني عليك
خلاص عنيا بقت في حضن عنيك
ماعدش ينفع أي كلام
ال باقي يادوب ايام
واعيش باقي العمر معاك
فاكرة كده من كام يوم
نسيت عنيا شكل النوم
طرت وياك في الاحلام
عيشتني في احلي غرام
مليت قلبي بفرحة وشوق وغرام
عشت ليالي بحلم بيك
بفكر في لحظة عدت بين ايديك
عشت معاك في خيالي ايام
احلم بيك من غير كلام
خليتني اتمني يفوت اليوم
والاقيك بين ايديا كل يوم
وفي لحظة اتغيرت الاحلام
سمعت عنك من تاني كلام
كلمه وهمسه وشويه لوم
بعدت ونكرت الكلام
سمعته تاني يبقي مش اوهام
خدتني الافكار لبعيد
حسيت جوايا شيء جديد
حسيت ببرد و خوف شديد
قلت ابعد شويه بعيد
فكرت فيك اسال عليك
سكت لساني عن الكلام
تاه مني الشوق وخلص فجاه الغرام
سالتني ايه غيرك
نكرت خفت ازعلك
مقدرتش تاني ارجعك
تحس بالحزن ماليك
وعدتك كتير اني اسعدك
ومن الهموم اني احرمك
يمكن خلفت وعدي كتير
ورجعت تاني اوعدك
عرفت انك قد الكلام
عرفت ان قلبك مليان حنان
سكت وداريت جوايا الكلام
حاولت متغيرش عليك
احساسي خاني في الكلام
مقدرتش ابين ليك الحنان
لسه جوايا صدي الاحزان
خايفه يكون ال فات كلام
واكون بنيت امل في اوهام
محتاجالك ومقدرش اكلمك
يادي الحيرة ال مش وقتها
تعبت والله من التفكير
وسوسلي كتير الشيطان
بس خلاص فات الاوان
كلها بكرة وكمان يومين
واعيش معاك مهما يكون
وصف الاحساس
تحياتي

الجمعة، 14 مايو 2010

امسك الخشب .. ولا تلمس الزجاج

قلبي كالزجاج وقلبك كالخشب اعذرني في الوصف
فانها اشياء تمر علينا معا تظن انها بالنسبه لك صغيرة وتافهة ولا داعي من ان نقف امامها كثيرا
ولكنها بالنسبه لي تركت بداخلي اثر كبير و احدثت بلبله في تفكيري
والحدث الاكبر انك اعتبرتها تافهة ولم تعيرها اهتمام وتركتني اتالم وحدي من اثارها واثر ما احدثت انت فيها
وعندما اتحدث معك تستغرب اني لازلت افكر فيها واستغرب انا انك اهملتني هكذا واهملت احساسي
فيا عزيزي احاول ان اوصل لك دائما فكرة اني قلبي كالزجاج لا يحتمل الطرق عليه بمطرقه اخف من اخف مطرقه متعارف عليها تحدث به شروخ واثار خادشه حتي لو كانت الطرقه خفيفه جدا
بينما قلبك كالخشب يتحمل اية طرقات ثقيله ولا يحدث به اثار منها
فطلبتك فقط تعامله برفق وحنان وتحتويه بداخل قلبك وتحافظ عليه ان يجرحه فان تحمل احيان لن يتحمل الاخري
وتذكر ان الزجاج يستطيع احتواء الماء بداخله دون ان يتسرب ولكن الخشب لا يعرف كيف يتعامل مع الماء او ايه سائل هش لا يستقر ساكن
كذلك قلبي يحتوي مشاعر رقيقه حساسه كلمات بسيطة تؤثر به وكلمات اخري تدق نواقير خيبه امله فيمن احب
فانت تقتلني وتشعرني بخيبتي عندما تعامل رقتي ومشاعري علي انها سخف وفضاءو لا تتالم مثلي ولا تعلم ما بداخل قلبي من نار تشب وتحرقني لانه التجا اليك ووجدك تصد عنه بظهرك وتتعامل معه بانه شيء لا يذكر
حبيبي .. نعم حبيبي وساظل اقولها ولكن ساعدني الا افقدها او افقد احساسي بها لا اطلب الكثير لا مال ولا ذهب ولا مرجان ولا حتي لبن العصفور فقط كلمات رقيقه مشاعر حنان امل رحيم
اعلم انك ستحتاج قلبي في لحظات ولكن لا تهدم الطريق بينك وبينه وتاكد انك عندما تحتاجه ستجده نبع من الحنان وسيحتويك بين ضلوعه ويداريك من غدر الزمان
وصف الاحساس
تحياتي

الأحد، 9 مايو 2010

في رحلة سفر

تنهدت من قلبي وناديت علي عامل يرفع حقيبه سفري فوق السيارة
ركبت بجوار النافذه وانتظرت كثيرا كي يكتمل العدد وتنطلق السيارة تاخذني من هذا المكان
بينما انا امتع نظري من معالم بلدتي واتذكر كل لحظة مرت فيها
كل ذكرياتي الجميلة كل احزاني وجروحي
انطلقت السيارة اخذت اتلفت حولي ادور بعيناي اتابع اختفائها اخر لحظاتي معها الي ان اختفت معالمها شعرت بشيء يتداخلني
شعور غريب كاني اطير داخل الزمان لا اتبع اي مكان ولا زمان لا تلمس قدماي ايه ارض
اشعر باني لست سجينة احزان المدينة السابقه ولا اجد في نفسي حرج ان اتذكر اشياء مرت في اماكن اخري
سكنت احداثها بقلبي ولكن داريتها عن ذاكرتي حتي لا تاخذني الذكري لناس اصبحت حياتي بعيده عن حياتهم وكثيرا نازعت نفسي كي تترك ذكراهم بدون تجريح اكثر
والان تلك الروح الحبيسة تتعلل بعدم انتمائها لاي مكان فاخذت تهوي اليهم
منحدرات ومرتفعات تاخذني الي اعلي سماء وتدسني مرة اخري تحت الرمال وكانها تعزف الحانها علي ذكرياتي وتتالم وتفرح معي
اه لو الطريق يشعر بخطواتي لعلم كم تقاسي نفسي وكيف يزيح همي بكل خطوة اخطوها فوقه
فتحت نافذتي علي كبرها التمس تيار الهواء يخلخل جسدي ويخترق ثنايا صدري يذيب جبال سكنت فوق قلبي جعلت حتي نفسي الذي يمدني بالحياة غريب عني
تنفست بعمق اكثر بعدما هدات روحي واقتربت البلده الاخري وبدات ملامحها تظهر
وكاني اعد نفسي كي ارتدي نفسي الاخري التي اعيش بها هنا
اخذت ذكرياتي ودفنتها بقلبي مرة اخري وعقدت مقارنتي المعتاده بين حياة تمنيتها ورسمت كل معالمها
وحياة اخري رسمت لاجلي ربما كل شيء فيها اجمل مما تمنيت ولكن فيها شيء واحد ينقص
اني لست هنا اجد روحي تهفو لمكان اخر طالما حلمت به
ربما هو وقت احتاجه كي اقدر جمال حياتي وانتزع روحي من كل مكان تركت فيه اثر واخذ من رائحتها جزء
احتاج الملم روحي كي استطيع ان اكون انسان به روح كما به جسد
كم انتي متعبة يا رحلتي ..كنت اظن اني ساجد راحتي فيكي ولكن فعلتي بي ما عشت فترة طويلة اخاف من مجرد ذكره
نزلت من السيارة واتجهت الي بيتي وارسم علي وجهي ملامحي المتعارف عليها هنا
ونظرت الي السيارة شعرت بامتنان لها لانها سمحت لي بان احلق داخلي بلا قيود وحملت عني مشقه الطريق
وصف الاحساس
تحياتي

الخميس، 6 مايو 2010

من نوادر ام خليل


من كام يوم كنت بشرب الشاي بتاع العصاري في البلكونه بتاعت بيتنا
بيتنا ده بقي في حته شعبيه اوي كل ال فيها حبيايبي واصحابي وكلهم بيعزوني انا وخليل ابني
قدامي ساكنه ام رمضان وابنها رمضان وبنتها الهبله ال طول النهار تجري ورا نفسها
المهم البلكونه بتاعتنا دي بقي من بتوع زمان حاجة كدة تشرح القلب طول في عرض بدوران الهوا فيها يرد الروح
الواد خليل كان بيلعب بلي مع الواد رمضان وانا بتفرج علي العيال كده
لقيت حركة غريبه في الشارع قلت في عقل بالي خير اللهم اجعله خير ربنا يجيب العواقب سليمه
ناديت علي المقروض خليل ما ردش عليا عيال اخر زمن ناديت علي ام رمضان حبيبتي
قالتلي والنبي معرف
بعتنا الواد رمضان يشوف في ايه رجع بعد فين وفين قال ايه شيخ الحارة بيموت يا ساتر يارب
نزلت جري خدت الواد خليل ابني علي كتفي اروح لمراته اواسيها وبالمرة اطقس اشوف كده مين هيمسك مكانه رحت ولقيت الراجل ضايع عمال يقلب في الاموات علي الاحياء ولا داري بالدنيا
قلت في الظروف ال زي دي لازم نحسم الامور ونعرف مين هيمسك مكانه وهو عيان كده محدش عارف هيقوم تاني ولا ايه
قلت اجمع الشباب بتوعنا والرجاله اسمالله عليهم عشان نعرف رجلينا من راسنا امال يعني نوفاجا بشيخ من بره الحته ما يعرفش عنا حاجة
واحنا في القعده قام واحد كدة باين عليه بيودع الدنيا قال انا هبقي شيخ الحارة
ضربت ايدي علي قلبي وشقت كده زي شهقه الملوخيه هييييييييييييييييييييييييه انت
قالي اه بصوته الجاهوري كده ومافيهوش نفس اه انا
الناس هاجت وماجت مالك يا ست ام خليل في ايه ده عمك سعد راجل ملو هدومه
قلت علي عيني وراسي بس ده رجل جوه ورجل بره يومين تلاته ونلاقيه مسطح جنب ابو عمر كده وبندور علي غيره
قالولي ما هو لازم يبقي راجل ملو هدومه كدة كدة وكبير قلت وماله بس ده بيودع ده بكره مش هيفتكرنا
وزي ما يكون الراجل فاقس الحكايه قال خلاص خدو ابني
يا دي النيله من سعد لابنه يا قلبي لا تحزن قلت لالالالالالالا خليل ابني اولي بيها
واد لسه صغير وبصحته وشبابه وهيهيصنا
نط الواد خليل جنبي وقال اه يا اما انا ابقي شيخ الحارة واحبس الواد رمضان وامه
يا دي النيله الواد اهبل اتوكس يا موكوس مش قدام الناس كده قامو الناس قالو ما بقاش الا خليل ال كل جريه ورا البلي يبقي شيخ الحارة
فجاه كده وبقدرة قادر قام ابو عمر من الموت ال هو فيه وقال مفيش غيري شيخكو
ياعم اتلهي ده انت ما فيكش نفس
يا جماعه عايزين واحد جديد راجل وملو هدومه كده مش واحد بيودع الدنيا
الراجل اما سمع الكلمتين دول قام واتنفض من مكانه وقال يا ام خليل انا شيخ الحارة ومالكوش غيري ومن بعدي مفيش ووفري بقي تعبك ونفسنتك لنفسك قال خليل قال
هيييييييييييييييه دي شهقه تانيه هو انت كنت سامع يا راجل
يخرب بيتك ده انت حيه ولا ايه
الراجل قام وقالنا سعيكو مشكور يا اخوانا مع السلامه
راجل قليل الزوق صحيح بقي انا قلبي علي الحارة يقوم يطردنا كده من غير لا احم ولا دستور
رجعت البيت وانا متغاظة والواد خليل راح يلعب تاني
عيال اخر زمن
وصف الاحساس 
تحياتي 

الأربعاء، 5 مايو 2010

دفعة مقدمه

خطوات نسير بها في الحياه كل حسب رغبته
واخرين حسب ما يروق لهم واخرين حسب اهوائهم
الكثير يري ان ما يخصه من الحياه اقل من اخرين كثيرين
ولكن من يدري عن حياه الاخرين بالكامل
من يملك المقارنه بين الحالتين
لكل انسان شيء مقدر له من كل شيء جزء
قد تختلف الاجزاء بالنسبه للاشخاص ولكن كل جزء تحصل عليه يكمل الاخر
وكان الرزق دائرة مقسمه لكل شخص من كل نوع ياخذ جزء و وتغلق الدائرة علي انه اخذ حقه من كل شيء
ربما تروق لنا اشياء واخري نقول انها ليس لها اسباب
وليست لها قيمه وربما نهملها لعدم الاهميه
لكن كل شيء في الحياه له سبب وكل سبب يعتبر في حياتنا دفعه مقدمه تاخذها لتكمل المسير
ربما تعتقد انها لا تكفي لتخطي جزء كبير ولكن نحن من يستطيع ان يوزع الدفعه المقدمه هذه كي تلائم خطوات الطريق
قديما قال لي صديق " خدي خطوة لورا عشان تقدري تاخدي اكتر من خطوة لقدام "
حينها لم افهم معني خطوة للخلف واي خطوات استطيع ان احسب لها في الامام
وبحكم دراستي درست شيء اسمه تجميع
عباره عن عمل برنامج لاستخدام الاشياء
فمثلا عند الانتهاء من شغله معينه يتبقي وقت لابد ان تنتظره لعمل شيء اخر مرتب علي الاول
فكنا نضع اشياء في النصف يتم عملها لا تعتمد علي الاول ولا علي الثاني ولكن يمكن استخدامها كخطوة رابعة بعد الثالثة الباقي عليها فترة قبل البدء فيها
هنا تكون اخذت خطوتين في خطوة واحده وحجزت مقدما جزء من الدفعه المقدمه التي هي هنا الوقت والانجاز واستفدت بفارق الوقت بين الخطوتين واخت خطوة للخلف بالتجهيز لعمل خطوة رابعه واخذت خطوتين في نفس واحد
فكل شيء من الحياة لك فيه نصيب وعلي حسب قدرتك تستطيع ان تاخذه في وقته او بعده او بعد فوات الاوان
علمتني الحياه ان كل لحظة في العمر لحظة اخيره لا تاتي مرة اخري وان كان الطريق من بدايته ليس به بصيص نور فلا انتظر النور في اخره
وليس عيبا ان نعترف بالخطا ونغير الاتجاه فالعمر ليس له بدل فاقد والاستمتاع بالعمر افضل من الحرج من لحظة الرجوع لمجرد تصحيح اختيار خاطء كل بني ادم خطاء ولكن احيانا تكون الاخطاء مصابيح نور نري بها الاشياء ونحافظ علي ما تبقي من العمر
وصف الاحساس
تحياتي

السبت، 1 مايو 2010

تخاريف عانس ..!!!


بتاخدني الدنيا تمشي

ما بقدرش اصد نفسي

بنادي وما بسمع حسي

اقول يا هو تعالو

شيلو مني مش قادرة لحالي

ولا صوت تاني سامعني

ولا حد بحنانه فاكرني

اه يا قلبي يالي خايف

سنين مش لاقي قلب عاشق

اقول ولا خلاص مش هقول تاني

كتير قلت ولا حد نداني

ولا حسو بروح تايهة غريبه

بتنادي انا هنا يا حبيبه

قالو عليا شبح عنوسه

قلت حرام بكرة هبقي عروسه

قالولي راحت عليكي

ده الحزن باين في عنيكي

ومن زمان مش لايق عليكي

تكونيش ولد مش بنوته

قلت يا هو حرام عليكو

خليتوني اشك حتي في نفسي

انا بس يعني كان نفسي

حد يقولي كلمه تحسسني اني عروسه

ولا ريحة الفرحة تلف عليا

من زمان وانا قلبي مشتاق حنيه

سمعت منهم ضحكة غريبه

كمان بتقولي حنيه

تطلعي مين انتي

ولامين في دول تطلعي هي

مين اداك الحريه

وقالك تلعبي ده الاحلام ورديه

لا يا ماما اصحي شويه

انتي اخرك ولد لابس جيبه

ولا بنت ما ينفعش تبقي عروسه

لايقه عليها العنوسه

صرخت بكل ما فيا

حبيبي ايده في ايديا

عاجباه ومالي عنيا

قالو صدقتي نفسك ولا ايه

تلاقيه بيتسلي شويه

قلت لا دبلته في ايديا

وبكرة هيكتب كتابه عليا

قالو حلم ده ولا حقيقة

مابقاش غيرك انتي يا مضروبه

وجايه عملالنا فيها عروسه

الله يرحم ايام العنوسه

اوف عليكو طهقتوني

هو انا ايه مش انسيه

مش من حقي افرحلي شويه

ياخوانا روحو بلا خيبه

انا وحبيبي بقينا في زكيبه

وراحت عليكي يا عنوسه

خلاص اديني بقيت عروسه

وصف الاحساس

تحياتي