الخميس، 24 نوفمبر، 2011

انا مين منك


انا مين منك 
ابنك 
عدوك 
شهيدك 
صديقك 
حاميكي 
حراميكي 
احترت انا فيكي 
انا ده ولا ده 
هنا ولا هناك 
قتل ونار 
حريق ودمار 
مين فيكي وليد 
مين خلاني شهيد 
اخ واب وبيت وجيران 
كنت فاكر اني جبان 
فجاه لقيتني في وش النار 
صرخ القلب مقبلش العار 
حلف بربه ياخد التار 
دم شهيد في كل مكان 
بيصرخ بلدي يا بلدي 
انا فداكي 
انا اهلك ودواكي 
انا فداكي 
انا مين فيكي 
قاتل مقتول 
كلنا انسان 
كلنا واحد مهما كان 
مين خلانا نبقي اتنين 
اخ واخ وبينهم تار 
انا حالف مقبلش العار 
اقتل اخويا واخد التار 
احرق قلبك ليل ونهار 
اخ واخ وبينهم نار 
مين قاتل ومين غدار 
مش فارق ايه ال سار 
المهم اننا احرار 

الثلاثاء، 22 نوفمبر، 2011

الزعيم ..!!

هل هي كلمه السر لحل الازمه
هل هي المفتاح السحري لكل ما يحدث ان يكون لنا زعيم
قديما قالو
حيث لا سيد فالكل سيد وحيث الكل سيد فالكل عبيد
اذن الحل هو وجود هذا السيد ولكن ما هي الضمانات
ما هي ضمانات ان هذا الزعيم سوف يكون مطاع في كل البلاد ومن كل الجهات
السؤال الاهم
ما الذي يستفيد به المجلس العسكري ليجعله يثبت في الحكم سنتين اخرتين يتخلي عن مهامه الاساسيه ومكانه الاصلي علي الحدود ليخلع بدلته العسكريه ويتقلد كرسي الرئاسه
هل لانه لا يصلح احد ان يجلس علي هذا الكرسي ام انها اطماع شخصيه لبعض الزعماء
ثلاثه اتجاهات لا تتقابل في نقطه
الشعب
الجيش
الزعيم
هل سيطيع الجيش والشعب الزعيم ويصدق علي كل قراراته وتنتهي الازمه ام سندخل في ازمه جديده ويعود الشعب للتحرير من جديد حتي مع وجود الزعيم
هل الزعيم سيمكنه ان يحكم الجيش والشعب معا ويرضي جميع الاطراف فلا ينقلب عليه الشعب فيستعين بالجيش علي الشعب ولا ينقلب عليه الجيش فيخلعه ويبحث عن غيره وسط حاله اخري من الفوضي ايه سياسه سينتهجها الزعيم مع الجيش لترضيه ومع الشعب ليمتص غضبه وينسيه التحرير ومع كل ذلك يكون رجل صالح ليس له اطماع شخصيه
الجيش وسياجه الواقي الذي يدافع وبقوه عن ساحته فلا يسمح لاي احد بالاقتراب او التصوير ومن يتخطي حدوده فهو الجاني علي نفسه
من هذا السلمي ليضع وثيقه تقلب البلاد راسا علي عقب ولا يستطيع احد ايقافها الا اذا كان يقف علي ارض لا يمكن هدمها ومحمي بكل الطرق والوسائل

الذي يحدث الان في مصر ليس له كلمه سر سوي الشعب
الجيش من الشعب ويخدم الشعب
والشرطه تحمي الشعب
الزعيم نفسه يخدم الشعب

اذن السلطه هي الشعب ولكن عندما يهان الشعب فيقرر ان يحمي نفسه ماذا سيحدث
هل يمكن سحب اولادنا من الجيش فيصبح الشعب والجيش كتله واحده ولا مكان للزعماء بيننا
فهل وقتها سيرفع احد السلاح في وجه احد
كلنا في نفس المرتبه كلنا الشعب
نحن نحارب بعض لاجل اخرين
هل ندرك حقيقتنا ام اننا ننصاع للاوامر بلا تفكير
اللهم ارحمنا وارحم مصر واحمي مصر واهلها وارضها ومبانيها ونيلها وترابها وصحاريها وكل شبر فيها
وصف الاحساس
تحياتي

السبت، 19 نوفمبر، 2011

قصه احتلال الشمس الفصل الاول ج 2

في مكان اخر علي وجه الارض

في امريكا في مركز ابحاث الفضاء

يجري العمل علي قدم وساق الكل يتحرك في كل اتجاه يدخل مارك غرفه رئيسه وبيده اوراق ويقول
مارك : سير احنا كلنا في المركز بنتابع ومش واصلين لحاجه
سير ستيفن : ازاي كل ده يعدي عليكو ربع الشمس يختفي اكيد انتو مقصرين
مارك : سير كلنا عندنا اشغال وبنتابع كل حاجه بس ال حصل حصل اسرع من اي توقعات محدش صدق جون اما اتكلم ولا حد تعاون معاه
ستيفن : وجون كان عارف حاجه
مارك : جون كان بيقول انه شايف حاجات زي نقط سودا في الشمس وتابع كتير بس ما قدرش يوصل لحاجه
ستيفن : وازاي محدش قالي
مارك : سير كلنا عارفين جون واحلامه وتخيلاته ده غير انه عنده مشكله في العين اليمين من سنين بتحصل كل سنه مره وفكرنا ان ده وقتها
ستيفن: دلوقت انا عايز تقارير مفصله عن ال بيحصل وده هيستمر اكتر ولا لا وكمان اعملي اتصالات مع دول العرب والالمان والفرنسيين واليابانيين خلينا نشوف مين عنده معلومات

في احدي دول الخليج

دانه : ماما .. ماما ..
سميه :ايش فيه دندونتي ليش تصارخي
دانه :ماما الشمس حد اكلها
سميه: شلون يعني
دانه :فيها حته ناقصه
سميه : حياتي يمكن فيه كسوف ولا شيء يلا علي مذاكرتك يا شقيه

في اقصي الشرق في اليابان

يوكوهاما : نعم سيدي وصل التاكل لنسبه 21% من المساحه تقريبا
بوهايا: يعني النسبه يوميا كام
يوكوهاما :ليست ثابته سيدي يبدو ان الامر غير مخطط او غير منتظم
بوهايا : هل تواصلتم مع الالمان او الامريكيين في هذا الامر
يوكوهاما :ليس بعد سيدي
بوهايا :حسن ابدء التواصل لان الامر يبدو خطير جدا ولابد ان تتحد قوي الارض كامله لدراسته


وهكذا في كل بقاع الارض البعض يدرس والبعض يتجاهل والبعض الاخر لم يلاحظ شيء

ولكن ماهذا الذي حدث للشمس هل قصد احد اخفائها ام انها تتاكل ؟

وصف الاحساس
تحياتي

الثلاثاء، 15 نوفمبر، 2011

حيطه سلف ...!!!

عايزه اخبط راسي في الحيطه محدش معاه حيطه سلف
سامعاك يالي بتقول
_ _ يعني من قله الحيطان ال في البلد
** لا معلش اعذرني اصل انا عايزه حيطه بمواصفات خاصه
_ _ استغفر الله حتي دي كمان فيها مواصفات خاصه صبرني يارب ارغي يا عم الامور
** بص يا سيدي وما ستك الا انا عشان بس تفهم الحكايه الحاله دي بتجيني كل فتره كده زي ما يكون الواحد بينسي شويه واما يرجع يفتكر تاني يدور علي حيطه سلف
_ _ انجزي يا حجه
** يا سيدي صبرك بالله بس عشان الكلمتين ال في راسي اه يا راسي والله راسي وجعتني من ال فيها واعصابي معدتش تتحمل كل ده
_ _ يا مصبر الوحش يا رب
** يوووه هتنسيني سيبني اتكلم براحتي هو الكلام عليه جمارك حتي الكلام هتحسبه عليا
_ _طب لخصي
** يا سيدي الحكايه ومافيها ان الدنيا دي مهما وسعت وفكرتها واسعه بلاقيها ضاقت واما تكون ضيقه اوي بلاقيها واسعه اوي
_ _ هبل هو ده ولا ايه ايه ال واسعه وبعدين ضيقه وضيقه وواسعه انتي هتخرفي يا ست انتي
** يا سيدي قلتلك صبرك بالله الحكايه اني اما بحس ان الدنيا بقت بقت واسعه علي ناس بتقف في وش ناس وتضييق اوي عليهم واما تضيق عليا اوي بلاقيها بتوسع اوي لغيري مش حقد ولا حسد بس نفسي افهم ليه احنا صنفين صنف ابن البطه البيضا وصنف ابن البطه الزفت السودا واغلبنا ابن الزفت السودا تلاقي نفسك طالع عينك علي حاجات من حقك وكل الناس عارفه ان ده حقك و شايفين ظروفك وحالتك المنيله ومحدش يقدر علي حاجه غير الله يقويك وتلاقي حد تاني لا في ظروفك ولا له حق في حاجه الدنيا معاه ماشيه اخر حلاوه
_ _ يا ستي ارزاق هتبصي للناس في رزقها
**اللهم لا اعتراض يا سيدي بس العدل مش كله كده ضلمه ضلمه واما نيجي نفرح تضيق في الاخر و ..
_ _استني هنا ايه دخل ده كله بالحيطه الزفت ال انتي عايزاها
** ما هو انت لو تصبر هتعرف ان السبب في ده كله حيطه
_ _ مش فاهم حاجه وخلصي في ليلتك دي
** بقي يا سيدي الناس ولاد البطه البيضه دول وراهم حيطه طول بعرض محدش يقدر يزحزحها ولابسه وش الفدائيين والملايكه وبتحمي ولاد البطه البيضه دول بكل قوتها وجمايلها ولسانها العسل ووش البراءه والنحنحه والمسكنه بصنعه لطافه يعني محدش يقدر يخشلها في حوار ممكن بيتقو شرها بيشترو خاطرها ساعات من تحت الدرس وساعات من ورا القلب وساعات مصالح يا عم صالح
انما ال زي حالاتي وراه البحر ومن قدامه العدو وهو لايص في النص مش عارف يعمل ايه ولا يروح لمين فبيدور علي حيطه يخبط راسه فيها يعلق عليها حموله وهمومه تسد عنه شويه
_ _ اقولك علي حاجه تيجي نقر عليهم
** وحياتك لو بياثر كنت عملتها
__ طب انتي عايزه مني ايه دلوقت
** هو انا بتكلم لاوندي عايزه حيطه اخبط راسي فيها
محدش معاه حيطه سلف
وصف الاحساس
تحياتي

السبت، 12 نوفمبر، 2011

قصه احتلال الشمس الفصل الاول

سمر : اووف يا شيخه غوري من وشي بقي
امل : ههههههه انتي بتتخانقي مع دبان وشك ولا ايه سمر : الشمس في وشي طول الطريق دماغي وجعتني
امل : ما تبقيش تركبي في الناحيه دي تاني
سمر : طيب بس شوفيلي حاجه احطها في وشها خليها تمشي من وشي
امل : خدي الاسكتش ده
...
...
في مكان اخر

كريم ... كريم ..انت لسه نايم ..قوم بسرعه

كريم يسمع هذه العبارات من صديقه عمر وكعادته يضع وسادته علي راسه لاسكات عمر فهو يحب النوم لدرجه العشق ويكره ان يوقظه احد خاصه عمر
وفي هذه اللحظه يفتح عمر بلكونه غرفه كريم
عمر : يا كريم قوم بسرعه الظاهر القيامه قربت
كريم : يوووه هو انت ما وراكش حد غيري روح قوم حد تاني
عمر : يا جدع انا بتكلم بجد قوم بسرعه
كريم : اهو اديني قومت فيه ايه بقي
عمر : اطلع بص من البلكونه وانت تعرف
كريم : طب ما ينفعش من الشباك اسهل
عمر : يا عم اطلع بسرعه شوف الشمس قبل ما تختفي
كريم : هو فيه كسوف ولا ايه
عمر : لا مش كسوف محدش بلغ علي حاجه ....بص ... بص
كريم : ايوه شايف ايه هو ده القيامه هتقوم ولا ايه
عمر: مش بقولك
كريم : طب التليفزيون بيقول ايه
عمر : التليفزيون بتاعنا جايب فيلم لسعاد حسني ولا في دماغه
كريم : ياعم ده الشمس متاكل ربعها مش في دماغه ازاي طب نعرف منين ايه ال حصل
عمر : بدور من الصبح في الفضائيات وعلي النت مفيش حاجه
كريم : خلاص ما تكبرش الموضوع يبقي حاجه عاديه وهتعدي سيبني بقي انام
يدخل كريم في سريره بينما يظل عمر في البلكونه مصوب نظره للشمس ويحدث نفسه
عمر :طب ده لو كسوف كانو قالو امال ده ايه بس يارب استرها من عندك

وصف الاحساس
تحياتي

الثلاثاء، 8 نوفمبر، 2011

من كل فيلم اغنيه

لا تاتي الطعنات الا من اقرب المقربين حيث يعرفون اماكن الضعف ويتفننون في العزف علي الجروح والقاء سهام الكلمات في مواطن الحساسيه التي تترك اثر في النفس لا يزول

""""""""""""""""""""""""""""""""""

اتساءل دائما هل تذكرني ام انك اصلا لم تعد تعرفني وبداخلي يتردد سؤال وما الفائده طالما ان كل مركب سارت في اتجاه معاكس ولن يحدث مره اخري ان نلتقي ولو حتي صدفه

"""""""""""""""""""""""""""""""""""

تبقي الذكريات معلقه بالواقع تتارجح بين الامل والجنون فعندما يسقط الامل تكتشف انك اصبحت لا تعرف انت من يكون ذلك العاشق الذي احب بجنون ام ذلك الذي تعلق بالخيال وعاش علي الظنون

"""""""""""""""""""""""""""""""""

ليس لابد ان تكون بمفردك كي تشعر بالوحده فوحده القلب تكمن في فراغ محيط العين من الاحباب فحتي وان كانت الدنيا بمن فيها حولك فسيظل القلب وحيد حتي تفتح العين علي وجه من يسكن القلب

"""""""""""""""""""""""""""""""""

ليس للمال قيمه ان لم يصلح لشراء السعاده التي اصلا لا تباع ولا تشتري فربما وهمنا بالسعاده الزائفه كي نجد للمال قيمه ورغم ذلك فهو يفتح كل الابواب المغلقه

"""""""""""""""""""""""""""""""""""

الحزن لا يحتاج لدافع او سبب فيكفي ان تنظر للماضي في غرفه مظلمه وستشعر باعظم انواع الكابه تحوم حولك

""""""""""""""""""""""""""""""

الدموع لا تغير الماضي ولا تحرك المستقبل ولكنها تغسل الهموم فلكل دمعه ذكري مؤلمه

"""""""""""""""""""""""""""""""""""
الاحزان لا تاتي فرادي فلا تزيد في الحزن

"""""""""""""""""""""""""""""""

اوقات الفرح قليله فلا تدعها تمر بدون ذكريات جميله تخرج اوقات الحزن فترسم ابتسامه تبدد غيوم ظلام الليل وتذكر بالنهار

"""""""""""""""""""""""""""
وصف الاحساس
تحياتي

السبت، 5 نوفمبر، 2011

عيد اضحي سعيد

كل سنه وانتو طيبين ومصر بخير وينعاد علينا وعليكو الايام بخير يارب
بعتذر عن تقديم حلقه جديده من البرنامج لان الرسائل ال عندي خلصت لو في جديد هنزله في نفس المعاد
ان شاء الله انزل اجزاء من قصه احتلال الشمس ابتداء من يوم السبت المقبل في نفس وقت البرنامج يعني لو في حلقه هتنزل لو مفيش هحط القصه
اتمني انها تعجبكم
كل عام والامه الاسلاميه والعربيه والعالم كله بخير
وصف الاحساس
تحياتي