السبت، 1 مايو 2010

تخاريف عانس ..!!!


بتاخدني الدنيا تمشي

ما بقدرش اصد نفسي

بنادي وما بسمع حسي

اقول يا هو تعالو

شيلو مني مش قادرة لحالي

ولا صوت تاني سامعني

ولا حد بحنانه فاكرني

اه يا قلبي يالي خايف

سنين مش لاقي قلب عاشق

اقول ولا خلاص مش هقول تاني

كتير قلت ولا حد نداني

ولا حسو بروح تايهة غريبه

بتنادي انا هنا يا حبيبه

قالو عليا شبح عنوسه

قلت حرام بكرة هبقي عروسه

قالولي راحت عليكي

ده الحزن باين في عنيكي

ومن زمان مش لايق عليكي

تكونيش ولد مش بنوته

قلت يا هو حرام عليكو

خليتوني اشك حتي في نفسي

انا بس يعني كان نفسي

حد يقولي كلمه تحسسني اني عروسه

ولا ريحة الفرحة تلف عليا

من زمان وانا قلبي مشتاق حنيه

سمعت منهم ضحكة غريبه

كمان بتقولي حنيه

تطلعي مين انتي

ولامين في دول تطلعي هي

مين اداك الحريه

وقالك تلعبي ده الاحلام ورديه

لا يا ماما اصحي شويه

انتي اخرك ولد لابس جيبه

ولا بنت ما ينفعش تبقي عروسه

لايقه عليها العنوسه

صرخت بكل ما فيا

حبيبي ايده في ايديا

عاجباه ومالي عنيا

قالو صدقتي نفسك ولا ايه

تلاقيه بيتسلي شويه

قلت لا دبلته في ايديا

وبكرة هيكتب كتابه عليا

قالو حلم ده ولا حقيقة

مابقاش غيرك انتي يا مضروبه

وجايه عملالنا فيها عروسه

الله يرحم ايام العنوسه

اوف عليكو طهقتوني

هو انا ايه مش انسيه

مش من حقي افرحلي شويه

ياخوانا روحو بلا خيبه

انا وحبيبي بقينا في زكيبه

وراحت عليكي يا عنوسه

خلاص اديني بقيت عروسه

وصف الاحساس

تحياتي

هناك 10 تعليقات:

Unknown يقول...

بنت ما ينفعش تبقي عروسه

لايقه عليها العنوسه

حلوة دى دخلت مزاجى

وراحت عليكي يا عنوسه

خلاص اديني بقيت عروسه
اتجوزت ايه

سمع هوص (Abo 3li) يقول...

انتي كتب كتابك كان من يومين مش كده؟؟؟
لو كده يبقي الف مبرووووووووووووك...

وصف الاحساس يقول...

العيسوي الصغير
ايوة الحمد لله اتجوزت
نورتني
تحياتي

وصف الاحساس يقول...
أزال المؤلف هذا التعليق.
وصف الاحساس يقول...

سمع هوص
الحمد لله اخيرا
الله يبارك فيك
عقبالك قريب ان شاء الله
تحياتي

Ms Venus يقول...

ههههههههههه

عسولة اوى وجميلة


تسلم ايديكى يا قمراية يا احلى عروسة

فشكووول يقول...

السلام عليكم
بس تعرفى القصيده زى السكر .. هو ايه الموضوع بقىىىىى

انا قريت تعليقات عرفت ان كتب كتابك كان من يومين .. يعنى اقول مبروك .. الف مبروك .. والف لييه .. خليهم مبروك من غير عدد لحد ما تزهقى من العدد
مبرووووووووووووووووووووووووك

تحياتى

وصف الاحساس يقول...

فينوس

مرسي يا قمر ربنا يخليكي

وعقبالك قريب ان شاء الله

تحياتي

وصف الاحساس يقول...

عمو فشكول
الحمد لله هو فعلا كتب الكتاب كان من يومين

الله يبارك فيك وعقبال ولادك ال لسه ما اتجوزوش وعقبال الاحفاد
وخليل بالمرة

تحياتي

طفلٌ عاش في جسد رجلٍ كبير يقول...

طيب ما زال من يومين كان كتب الكتاب يبقى الأمور بخير إن شاء الله ..

وأكتفي لحد هنا .. وإن شاء الله أتابع بعد الرجوع من السفر ..

وألف مبرووك .. ويارب يتمم بخير ..

ومن عندي ليك أجمل باقة ياسمين شامية .. هدية كتب الكتاب ..

تحياتي .. ومع السلامة .. أشوفك بعد أسبوعين إن شاء الله ..