كركبة دماغ

طبعا يعز عليا انه يعدي شهر من غير ما اكتب اي حاجه في مدونتي العزيزه لذلك حبيت اعتذر لها عن تقصيري معاها والله غصب عني لو تعرفي انا دماغي عامله ازاي كركبه فوق بعضها كل حاجه بتجري من بين ايديا و اخده ايدي معاها لدرجه اني ماعدتش شايفه ال بيحصل ايه حاجات كتير بقت بتقع مني ومبعرفش امسكها تاني عارفه ان السنه دي تختلف كتير عن ال فاتت يمكن كنت في الاول فاضيه اكتر بشوف كتير بتعامل اكتر فكنت بقدر افكر واكتب اكتر انما بعد ما اتجوزت حسيت اني زي ال واخداه الدوامه كله شغال كونتنواس مفيش فاصل ونعود وطبعا بعد ما جه محمود ما بقاش كونتنواس في النهار والليل بقي الواحد مش عارف ياخد نفسه وابسط الحاجات ال بيحب يعملها بقي محروم منها جايز ما اتعودناش علي كل الشيله دي في وقت واحد او محدش قالنا قبل كده نعمل ايه ولا هنقابل ايه في السكه فبقي الحمل تقيل اوي حتي مش عارفين نفرح بحاجه من كتر الواحد ما حاسس ان ظهره اتقسم بقيت افكر هو الفرحه صغيره اوي كده ليه وليه الوقت ال كان زمان فاضيين فيه كان تقيل علي قلبنا انا مش هقول اني ما عشتش الحياه ال قبل كده ويعلم ربنا اني ما كنتش زعلانه ومقهوره عشان اتخطب واتجوز بس رغم كل ال عشته دلوقت حاسه اني ما عشتش واني كنت عايزه اكتر فعشان كده نفسي كل واحد يعيش الفتره ال هو فيها علي قد ما يقدر الجواز مش سهل ولا الحب فيه كفايه انما لازم الاهل يوعو ولادهم علي الحياه دي اكتر من كده ده علي راي ههنيدي كله ضرب ضرب مفيش شتيمه
فنصيحه ال لسه ما دخلش الحياه دي انه ياخد من الفتره ال هو فيها كل حاجه حلوه ويشبع من كل ال نفسه فيه قبل ما تقع الفاس في الراس لانه بعد الجواز مش هتقدر تغمض عنيك
وصف الاحساس
تحياتي