الجمعة، 3 يونيو 2011

كم اكره الرجوع اليك ...!!

لو كنت في ظروف تانيه ووقت تاني ماكنتش الفرحه تساعني من اني هرجع شغلي تاني زي السنه ال فاتت تقريبا في نفس الوقت كنت راجعه من اجازه الزواج وكنت بجد فرحانه اني هرجع الشغل تاني بس المره دي غير بجد كارهة المكان والناس وفي نفس الوقت مش متخيله اني اسيب ابني ال عمره 3 شهور من الساعه 7 الصبح ل 3 العصر عشان الناس دي فعلي قد ما كنت بحبهم علي قد ما بقيت برههم اكيد اي حد في مكاني كان لازم يكرههم اما حد يخيرك بين ابنك وشغلك تختار مين ...؟؟
اما حد يحاول يقتل الامل والحلم جواك والمفروض تبقي مبسوط تامنله تاني ازاي ..؟؟
اما حد يبقي شايف وعارف ظروفك وتعبك وفي ايده انه يخلصك ويريحك لأكن بكل اصرار يزيدها عليك تبقي عايز تشوفه تاني ازاي ..؟؟
الحكايه بدات من يوم ما عرفت اني حامل والحقيقه ماكنتش مبسوطه زي اي حد بيستني الخبر ده كنت مستغربه وكاشه من نفسي وان في حد جوايا ده غير تعب الحمل في الاول وكل خطوه لازم بحساب خصوصا اني بشتغل في بلد باخد لها 3 مواصلات زي الزفت تبعد عن مكان سكني 60 كيلو وطريقها كله مطبات وحاله قرف اخر حاجه فكل الحكايه اني قلت تعبانه فقامت الدنيا كاني اول حد يتعب او المفروض اني ما اتعبش وكانها حرب زي فيلم الغازيه لازم تنزل حسيت ان كل ال حواليا عايزين البيبي ده ينزل فبدل المشوار يبقي 3 مواصلات لا يبقو خمسه وبدل ما اريح يوم لا لازم تيجي كل يوم والله انا كنت بقعد زي الكرسي ال قاعده عليه لا شغله ولا مشغله 6 ايام في الاسبوع ولازم تيجي في المعاد وتمشي في المعاد ماهو الشغل مالوش دعوه باني باخد ساعتين في السكه رايح جاي ومش مهم اني بدفع 10 جنيه نواصلات ده غير لو جبت سندوتشين هناك يبقو 12 مش مهم اني كل يوم وانا رايحه وجايه حاطه ايدي علي بطني خايفه علي ال جواها ال انا ماكنتش مبسوطه بيه عشان ماكنتش عارفه قيمته لكن اول مره اشوفه في السونار راس وعمود فقري وانسان ولد مني ابني حسيت قد ايه الشئ ده غالي وقد ايه الناس دي وحشه اما حد يخيرك بين شغلك وابنك تغور الدنيا كلها قصاده فكان لازم احافظ عليه باي شكل ومش مهم اليزعل يولع بجاز فاخدت اجازه مرضي في رمضان ماقدرتش اواصل سفر وحمل وصيام وحر كتير والله اخدت اجازه جريمتي اني كنت تعبانه واخدت اجازه رجعت لقيتني متحوله للتحقيق وخصم من المرتب وطلعت مش بتاعت شغل ولو مش عاجبك الباب يفوت جمل طب انا لو مش بتاعت شغل كان ايه ال يخليني اروح المشوار المهبب ده كل يوم وبععدين ما انا كنت قدامكو سنه مش متجوزه وقلت يا جماعه استفيدو مني عشان محدش ضامن الظروف ولا حياه لمن تنادي كتير اخدت قرار اني مش رايحه تاني وفعلا اقعد يومين وخلاص مش عايزه اروح الاقي حد من اهلي او زوجي يقولي ما تديش فرصه لحد هما عايزين كده طب هو حد بيديني حاجه من معاه ولا حد دايم فيها اروح ارجع تاني ولاني مش برتاح من قاعده البيت فمكنتش بقدر اقعد بس والله كتير ال انا فيه مش عارفه الواحد في البلد دي اما يتسد قدامه كل السكك يشكي لمين يروح لمين ينصفه يعني طلب نقل جوه المصلحه اترفض قدمت طلب نقل لبره المصلحه اترفض طب مسكوني شغل اهو احسن من ال انا فيه ده يا اما امسك حاجه في اخر الدنا يا اما ماليش في الشغل مش عارفه الناس دي ليه مش بتحسب حساب انه يمهل ولا يهمل والله مش عارفه هروح بكره ازاي هقابلهم ازاي بدعي من كل قلبي ما اشوفش حد فيهم
يارب صبرني يارب
اللهم اني مسني الضر وانت ارحم الراحمين
وصف الاحساس
تحياتي

هناك 6 تعليقات:

Tamer Nabil Moussa يقول...

والله ياوصف الشغل الايام دى التعامل بقى فية صعب

ومحدش بقى يقدر

واللى مش عجبة الباب يفوت جمل

مفيش انسانية قلت وان احساسى بيقول انها انعدمت


معلشى وصف

الحياة دى فيها الحلو وفيها الوحش

بس للا اسف الوحش اكتر هذة الايام

هتقدرى تستحملى كملى

مش قادرة

ابنك وبيتك اهم

ربنا يوفقك ويكرمك

مع خالص تحياتى

وصف الاحساس يقول...

تامر نبيل


فعلا الناس بقت وحشه اوي
واديني مستنيه اشوف اخر الشهر ده المفروض نتثبت لو هرتاح هكمل مش هرتاح هاخد اجازه رعايه طفل انشاله ما ارجعش الشغل تاني او ربنا يسهل والاقي شغل في حته تانيه
نورتني جدا
تحياتي

Unknown يقول...

السلام عليكم أختي وصف

عارف إنها جملة مكررة جدا جدا..
بس لو حسيناها هتكون ليها وقع تاني:
"ربنا يعمل اللي فيه الخير"

وإن شاء الله سيكون الأمر أهون مما تتصوري..

ربنا ييسر لك أمرك..
وابقي طمنينا..

تحياتي أختي الكريمة.

وصف الاحساس يقول...

استاذ ماجد

دايما بقول لعله خير
بس ساعات النفس بتتعب لدرجه تقف مش عايزه تكمل
وربنا يقدم ال فيه الخير
نورتني جدا
تحياتي

نسرين شرباتي "أم سما" يقول...

حسيت بيكي أوي

انا لما بروح اي مشوار،، أي مشوار قلبي بيتقطع لما بخلي بناتي،،، ومش بخليهم عند اي حد،، عند ماما،،، خلاص فكرتيني حكتب عن اول مرة سبتهم حصل فيا ايه
مش عارفة حروح الجامعة كمان شهرين ازااااااااااااااي

ربنا يصبرنا بس

غير معرف يقول...

المعاني اللي ذكرتيها
"انا ماكنتش مبسوطه بيه عشان ماكنتش عارفه قيمته لكن اول مره اشوفه في السونار راس وعمود فقري وانسان ولد مني ابني حسيت قد ايه الشئ ده غالي "
ليها معنى كبير أوي .. مش بيعرفه إلا الأم ..
ويارب تكوني توفقتي بشغل أقرب لبيتك ويحقق طموحك ..
تحياتي ..