الجمعة، 9 سبتمبر 2011

مبادره ام خليل ..!!

لان كل واحد بيعمل حاجه بيسميها علي اسمه فسمتها باسمها ام خليل ال كلكو عارفينها ست جدعه وبت بلد شافت المحاكمه بتاعت الريس زي كل الناس وحست زي كل الناس ان الشعب هيطلع هو المديون وهيطلع هو الحرامي وهو القاتل وهو الوحش خالص ومبارك بريء برائة الذئب من دم ابن يعقوم فكان لازم تتطوع وتعمل مبادره الصلح بين مبارك والشعب لانه باين كده لسه بدري علي ما نلاقي طوبه تحت راسه ندعيله ربنا يفشفشها والظاهر انه مثبت في الدنيا كل الشباب مؤقتين وهو مثبت و امرنا لله المهم قالت نجيب الكبير والكبير اوي واهل المزاريطه والاهلي والزمالك وحرس الحدود كمان و جمال وام جمال وخالد وام خالد وال له وال مالوش وال عايز اهلا وسهلا وال مش عايز ييجي هنبعتله االمشاريب لحد البيت ونتفاهم ونتصالح واهو الصلح خير قوم نتصالح ده الصلح خير وبدل ما نسال المشير والوزير ونستني كلام المحاكم ال الله اعلم هتوصلنا لفين يمكن تطالب الشعب بالرحيل مهو مفيش سجن هيساع الناس كلها يبقي نرحل احسن المهم هنقعد نتكلم ونتكلم وال له حق ياخده وان كان علي جمال وام جمال يقوم يلطشهم قلمين يبردو نار الشعب وال بيسال الريس هيلبس ايه ساعتها بطمنه البدله الكحلي والكرفته المنقطه ال متصور بيها في كل الصور ده عشان ال بيسال علي المليارات ال اخدها اهو يبقي علي عينك ياتاجر معندوش غير بدله واحده بلاش افترا علي الراجل .....يوووه نسيت كنت بقول ايه
..
..
اه افتكرت ال بقي بيقول الشهدا ومش الشهدا فياجماعه الحي ابقي من الميت وال عند ربنا مش بيروح المهم نرجع سمنه علي عسل ونخزي العين واهو قلتو يتحاكم الراجل ما عارضش ده عشان ال بيقول يبقي رايسنا سوابق لا هو بس كان بيثبت حسن نيته مش سوابق ولا حاجه وما تقلقوش كل حاجه هترجع زي الاول واحسن كمان
العدلي في مكانه برجالته بغتتاته وببطلجتيته وقناصته وكل حاجه والداخليه المستخبيه ترجع تنتشر تغلس علي خلق الله تاني ولا كان في حاجه حصلت وامن الدوله يرجع يلم الناس تاني واحمد الريان يرجع السجن تاني ماقلنا بقي مفيش حاجه هتتغير وده كله عشان بس نعيش في امان اهو احنا جربنا 7 شهور قلتو البلد بتتسرق وبعد الثوره هنشوف الفلوس الدنيا ولعت واستلفنا من طوب الارض عشان ندي الموظفين مرتباتهم والعيال عدياتهم وهناخد الفلوس الناس ال شايلاها للزمن نسدد بيها وربنا يعوض عليهم بقي واهي الضريبه العقاريه زي ما هيه و رغيف العيش زي ما هو بترابه ومساميره وشويه الدقيق يعني انتو جربتو حد تاني ومقدرش يعمل حاجه احسن اتاكدتو اننا كنا في نعمه واتبطرنا عليها اهو بقي كده من دلوقت بنعلن ال في نفسيته حاجه من الريس يحضرها عشان نقعد قعده رجاله نتحاسب و نرجع بقي لحياتنا زي ما كنا للامن والامان والحنان والراحه والكوسه والصلصه وليقضي الله امرا كان مفعولا بس عايزاكو تتاكدو من حاجه تحطوها حلقه في ودانكو اه
القضاء بتاعنا نزيه نزيه نزيه تلاته نزيه لا في شهادات زور ولا تضليل ولاحاجه واهو نوفر علي رامز حبيب قلبي انه يجيب الديب من ديله يعني حطو في بطنكو بطيخه صيفي ونصيحه من اختكو وحبيبتكو ام خليل كل واحد يقعد بينه وبين نفسه يستغفر ربنا علي سوء الظن في الناس وعليه العوض و منه العوض وانا لله وانا اليه راجعون لا الريس بخير ما تقلقوش صحته زي الفل احسن حد يكون قلق ولا حاجه
ام خليل
وصف الاحساس
تحياتي

هناك 7 تعليقات:

بقاء رغم الشقاء يقول...

جميله قوى ياأم خليل قصدى يا وصف بالتوفيق ان شاء الله ... تحياتى

وصف الاحساس يقول...

بقاء رغم الشقاء

شكرا ليكي يا حبيبتي
انتي الاجمل
تحياتي

طفلٌ عاش في جسد رجلٍ كبير يقول...

أنا بالفعل كنت وصلت لقصص أم خليل القديمة الموجودة في المدونة بتاعتك ..
إلا إيه حكاية أم خليل دي .. أنا مش عارف هي معروفة عندكو في مصر ولا إيه ..
مش تكون حد من اللي بيمثلوا في الأفلام المصرية .. وربنا تخبريني مين هي بس علشان أفهم الكلام بتاعها زي ما تقصده ..
بس على كل هي ظريفة أوي ..
تحياتي

وصف الاحساس يقول...

مراتي

معلش هقول مرايتي عشان الاسم التاني ده طويل مش بفتكر مين ال عايش جوا مين
المهم ام خليل دي بقي يا سيدي وما ستك الا انا ست بميت راجل بنت بلد وزي ولاد البلد كلهم بيفتو في كل حاجه حتي لو مالهمش في حاجه مش ممثله ولا حاجه شخصيه من خيالي وبس
شكرا ليك جدا
تحياتي

فشكووول يقول...

السلام عليكم وصف
تحياتى وكل عام وانت بخير
يا ستى .. الملوك ملوك .. والعالم كله بيتحايل على القذافى عشان يقعد عندهم ويدوه اوضه بمنافعها ويعيش هناك وكمان بيتحايل على على عبد الله صالح .. ما علهش لعن الله الناس الكفره والمساندين للطواغيت .. ما علينا

انا يا وصف يكفينى انى رأيته فى القفص زى خلق الله .. وعلى كل بالرغم من انه ما عندوش دم ولا عرض وماسك فى الدنيا بايده وسنانه

والله انا ما استحمل يوم واحد من اللى هو عايش فيه والفضايح اللى نازله ترف عليه وغضب الدنيا كلها وهو راقد على السرير زى كيس القطن المسوس ويقول موجود .. روح يا شيخ ربنا ياخدك
تحياتى

وصف الاحساس يقول...

عمو فشكووول

والله نورت المدونه
فينك من زمان محدش بيشوفك ليه
لعله خير
كل سنه وحضرتك بخير والاولاد والاحفاد بالف خير
كلهم والله شبه بعض بس ده مالوش شبه
ده كان شاحت علينا من ليبا حتي ليبيا شحت علينا منها
يمهل ولا يهمل ولعل الله له حكمه في انه لسه عايش وبكامل قواه العقليه
ربنا اكيد له حكمه هتظهر الايام الجايه
نورتني جداااا
تحياتي

وصف الاحساس يقول...
أزال المؤلف هذا التعليق.