الأربعاء، 14 سبتمبر 2011

من لها غيرك يا ...الله

لست ممن يقطعون طول المسافات بالحديث اثناء السفر فضلا عن اني لست اعرفها ولكنها تشبه احد اعرفه فبدات هي بالكلام تحكي فشعرت ان لديها الكثير تريد ان تزيحه عن صدرها فبدات استمع لها فرايت فيضا من الطيبه تخرج منها فهي سيده بالمعني الشعبي الادق غلبانه كبيره السن من الواضح انها ليست متزوجه ولم تخض تجارب الحياه مع الابناء ولكنها من المععتمرين الذين تركو ايام في مطار السعوديه في انتظار يشفق علي حالهم احد لاحترام كبر السن ووهن القوه وطيبه القلب واعادتهم لديارهم كل ذلك بلا اكل او شرب انما ايضا في المطار مسجونين هكذا بلا نوم ولا راحه سبب انها ستقطع ساعات في السفر انها تبحث عن اشيائها اغراض سفرها حقائبها فلم يكفي ان تترك بلا رحمه انما ايضا اضيعت حقائبها مثل الكثير ممن كانو معها تحثت كثيرا وقالت " لو بس ما فيهاش حاجه كنت سبتها مش مهم انما جايبه حاجات حلوه فيها الروايح بتاعت مكه الجميله وايشاربات وعبايات لاخواتي ومصحف حلو
.....
كان معايا اتنين بس صاحبتي كانت عايزاه لابنها فادتهوله صحبتي دي اتعرفت عليها هناك وكانت زي اختي ورحنا سوا جده واشترينا الحاجات دي
......
وكنت جايبه تليفون لاختي واخدته تجربه وما ردتش حتي عليا هتاخده ولا لا بقالها اسبوع ولسه ما ردتش عليا
.....
كنت اشتريت تليفون هناك و بعد اسبوع شفت واحد زيه مع واحده فقلتلها شوفيلي ده اصلي ولا لا قالتلي لا ده صيني مش حلو قلتلها ده انا قلت للراجل عايزه واحد نوكيا اصلي وبايعهولي علي انه اصلي قالتلي روحيله رجعيه وان ما رضاش بلغي عنه الشرطي وهو هياخدلك حقك فرحت ما رضاش يرجعه رحت للشرطي بلغت عنه راح جي معايا المحل لقيت ال باعلي التليفون هرب راح محل تاني واما شفته شاورتله عليه راح ناداله وساله قالو دي بتكدب حلفتله انه هو باعلي تليفون صيني علي انه نوكيا راح الشرطي ضغط عليه لحد ما اعترف فخلاه رجعلي الفلوس وراح قافله المحل وقالي ده هيتحاكم فالراجل قعد يعيط فقلتله خلاص سامحه انا مسامحاه قالي ما ينفعش لازم يتحاكم بس انا والله ما كنتش عايزاه يتحاكم
.....
اخواتي ما يعرفوش اني رايحه فقفلت التليفون عشان لو اتصلو بيا ما يعرفوش اني في مصر اصلهم خايفين عليا وبعدين محدش فاضي و محدش هينفعني غير ايدي فرحت ادور علي حاجتي يارب تسهل السكه والاقي الحاجه والله لو ماكان فيها حاجه ما كنت دورت عليها
.....
هما ما كانوش سالين فينا لحد ما عملنا ثوره عليهم وكانو اخدينا في اتوبيس لحته بعيده قعدنا نزعق فيهم ونخبط في الاتوبيس عشان يروحونا والراجل مش راضي يرد علينا واما لقانا كده نزل كلم اتنين تانين وراح مودينا علي الطياره
.....
ده اجزاء من الكلام ال قالته من غير اي تعقيب ولا حتي ردودي عليها الناس الكبيره دي هل ينفع تتعمل فيها كده الست دي لسه هتسافر خمس ساعات علي ما توصل للمطار ده غير مصاريف السفر يعني مش فاهمه خلاص مفيش حد بقي عنده رحمه في بلد الرحمه في رحله العمره
مش عارفه اقول ايه غير انيش قادره انسي كلامها ولا شكلها وقلبي بيوجعني عليها يارب تلاقي حاجتها وترجع بيتها سليمه
ويارب مالهاش غيرك يارب احفظها ووقفلها ولاد الحلال وردها منصوره
وصف الاحساس
تحياتي

هناك 6 تعليقات:

بقاء رغم الشقاء يقول...

الظاهر اننا بنتعاقب عشان عملنا ثورة عشان مانعملش كده تانى ... مش كده ولا ايه تحياتى لك اخت وصف موضوعك جميل والاجمل انك تدخلى جوه النا س الطيبه وتسمعى اهاتهم وتحاولى تخففى عنهم لكن عاوزة اقولك ان ذى مافى نماذج كريمه فى نماذج للاسف بتستغل انها فى بلد غير بلدها وتفعل ماتشاء فى غفله من دى بلد الحرمين ولها احترامهاانا نفسى اتعرضت لموقف يسئ لنا احد المعتمرات شكلها لايدل على الفقر من قريب او من بعيد ولكنها اتت ليس للعباده وانما للشحاته طيب ليه وخاصة السيئه بتعم كيف يكون لنا كرامه وفى ناس بتعمل كده

فشكووول يقول...

السلام عليكم
تحياتى
هى كانت رحله صعبه على ناس كتير والسبب غلطة المصريين عشان يعملوا ثوره عشان كدا بيعاقبوهم
الشعوب دى فاهمه ان الحاكم هو مبعوث من عند الرب .. ما عاشوش ثقافة ان الحاكم موظف عندهم .. عشان كدا لسه بدرى على العرب انهم يتشبعوا ثقافة الديمقراطيه.
تحياتى

غير معرف يقول...

وصف - بقاء - عمو فشكوووول بيه ..
مصايب متلتله نزلت على معتمري مصر .. وعقوبة على الثورة .. وديمقراطية ؟؟ إنتوا بتقولوا إيه ..
دول في السعودية سمعتهم زي العسل بس اللي بيخرج من بطون الدبابير مش بطون النحل ويبقى بتاكل منه وبكل لقمة تجيك شوكة من بتوع الدبابير دي .. حتى أنا رغم أن العمرة كانت جميلة جداً .. إلا أن مدير الفندق جاله عرض على الغرف اللي إحنا حاجزينها أكبر من اللي إحنا دافعينه فاتقلب علينا ورفض استقبالنا وروح بقا يا سيدي دور على فندق تاني بزحمة الناس دي ..
لأ مش بس كده كمان وقف واحد سعودي بسيارته اللي موديلها 2007 وسلم علي ورحب بي كتييير أوي .. وياحزركم هو كان عاوز مني إيه .. أيوه تمام كان بيشحد شوية فلوس علشان هو عايز يملا سيارته بنزين ..
ومش هانسى الوقفة على حدود الحديثة والموظف اللي بعمل الجوازات يبقى لو حظك كويس خلال سبع تمن ساعات تنتهي الجوازات .. أما لو كنت معذب مامتك أو باباك .. يبقى تاكل صوابعك ندامة إنك طلعت بالبر علشان ممكن توقف في الحديثة 20 - 24 ساعة أو أكتر شوية بينما جناب الموظف بيتكلم على الجوال وبيضحك مع زملاؤه .. ومش عارف بيعمل إيه .. لأ ده حتى الصلاة اللي بنصليها بربع ساعة هو بقى تقي زيادة وتاخد الصلاة معاه يادوبك ساعة ولا ساعتين .. والفطور والتراويح بقه أربع خمس ساعات .. لأ وإيه في أرض الله المقدسة .. منهم لله الظلام ..
بس بحق أنا احترمت كل المصريين والأتراك والعراقيين والباكستانيين والبنغاليين والسعوديين برده وكل واحد كان يشوفني كان يدعي ربنا يفرج علينا في بلدنا الحبيبة .. سوريا ..
يا رب تصلح الأحوال يا رب ..
تحيتي ..

وصف الاحساس يقول...

بقاء رغم الشقاء

دخلهم ايه عملنا ثورة ولا ما عملناش ليهم عندنا ايه يحاسبونا عشانه
حالة الشحاته دي غريبه بصراحة يعني ال رايحة تعمل عمرة مش قصدها عمرة رايحة تسترزق بس مش ذنب الناس التانيه انهم يتاخدو بذنبها
نورتي يا قمر
تحياتي

وصف الاحساس يقول...

عمو فشكوول

فعلا كانت الرحله صعبه علي الكل والانظمة ال لسه متمسكة ان رايها هو الصح وطظ في الشعب مش هتدوم الريح ال جايه من الثورة ريح ريحتها حلوة هتنعش كل الناس في الدول ال جنبنا ومش هتدوم الاستبداد والظلم
ربنا كبير
نورتني جدا
تحياتي

وصف الاحساس يقول...

مراتي

ال بتحكيه ده كبير فعلا وخطير معرفش هما ليهم ايه عندنا ولا بيفكرو ازاي ناحيه واحد رايح يعمل عمرة كبير في السن يوقفو بالساعات عشان حاجتهم تخلص
بيكرهو الناس في عيشتها وهما متاكدين انهم بردو هيرجعو تاني مش هيحجو في ليبيا ولا السودان
بس ربنا كبير والمكان ده اما يتهان فيه عبد رايح يعبد الله بس يبقي انذار ان الحال ده هيتغير وبكارثه علي بلد ما احترمتش عباده ربنا
حمدلله علي السلامة
نورتني جدا
تحياتي