الاثنين، 6 فبراير 2012

الجلسه الثانيه ج 2

قلت : وانا اجيب الخبره دي منين اذا كنت اي حد تساله في حاجه ما يردش عليك وكمان ما بقاش حد يثق في شغلي
قال : كل ده هنناقشه بس عايز اعرف انتي بتستحملي لحد ايه
قلت : يعني ايه
قال : اما بتبدئي شغل جديد عندك مشروع وبتعمليله دراسه بيبقي احساسك ايه
قلت : ببقي متحمسه اوي وابدا اشتغل بسرعه بس اما بيطول بزهق بس بيخلص برده بس بيطلع مش صح
قال : متسرعه يعني مش بتراجعي خطوه خطوه
قلت : لا براجع في الاخر
قال : ومش بتشوفي الغلط
قلت : لا في حاجات بشوفها وفي حاجات لا
قال : يبقي كمان مش مركزه
قلت : وما بفهمش
قال : سيبي ما بفهمش دي علي جنب شويه دلوقت انا عايزك تفكري في الحاجه الاول جيبي مشروع اشتغلتي فيه قبل كده وطلعتي غلطانه ...
اشتغليه تاني بس خطوه بخطوه ...
اكتبي خطواتك علي جنب ..
نفذي خطوه واحده كل مره ...
لو خلصتي راجعيها وسيبيها شويه..
افصلي اعملي اي حاجه تانيه...
وبعدين ارجعي تاني راجعيها وانتي مش مجهده ...
واعرفي كل رقم كتبتيه جه ازاي لو حد سالك ايه ده تعرفي تردي ..
خلصتي اول خطوه خدي ال وراها ونفس الشي لحد ما تخلصي خالص ..
راجعي من الاول كل رقم وكل كلمه وبرده سيبيه يوم و ارجعي راجعيه ...
الفتره ال بتسيبيه فيها بتصفي مخك فبتقدري تشوفي ال ما شفتيهوش في اول مره ..
بعدين شوفي الشركه عملته ازاي ايه الاختلاف بينك وبينهم ...
هتطلعي شويه اخطاء تانيه ...
اكتبي انتي بتغلطي في اي ..
كل حاجه لقيتيها غلط اكتبيها وعيدي مشروعك من غير ما تعملي الاخطاء دي وراجعيه ...
هيطلع صح ...
خلصتي خلاص خدي واحد تاني نفس الطريقه ...
بس المره دي مش هتغلطي كتير ..
لانك هتاخدي بالك من كل حاجه غلطي فيها قبل كده ..
فياخد معاكي وقت اقل ..
قلت : بس فيه حاجات ما بعرفهاش
قال : علمونا زمان انك تقولي معرفش احسن ما تقولي اعرف وانتي ما تعرفيش ال ما تعرفيهوش اسالي فيه...
بس مش تسالي كده من الباب علي طول لا ...
نفذي مشروعك ال ما تعرفيهوش فكري فيه واعمليه برده زي ما فكرتي ..
وحطي تحته خط او مربع حدديه ..
اسالي الاكبر منك باسلوب كويس ...
انا عملت دي كده مش ظابطه معايا... ممكن تراجع معايا الجزء ده لانه مش متاكده منه ...كده ..
بس ما تبنيش غلط علي غلط ..
كل مره هتشتغلي فيها هتطلعي بخطوات معينه لاي مشروع ...
اكتبيها علي ورقه في مذكره ..
ممكن تكتشفي طرق مختصره تسهل عليكي هتكتسبي خبره منك ...
الوقت ال مش عندك فيه شغل..
هاتي مشروع الشركه منفذاه قبل كده ادرسيه كويس ...
رتبي خطواته شوفي ايه ال بيعملوه انتي ما تعرفيهوش ...
شوفي الاخرين بيفكرو ازاي كده تاخدي خبرتهم ...
لو في حد قريب منك في الشغل وتثقي فيه واكبر منك اساليه..
بس برده مش من الصفر يعني ما تقوليش انك مش فاهمه لا قولي انا فكرت ممكن تبقي كده انتو عاملينها كده ليه ..
دايما لازم يبقي عندك حاجه تتكلمي بيها قصاد ال بيكلمك تاخدي وتدي ما تاخديش بس كده تقدري تستفيدي ...
قلت : طيب هحاول
قال : بتحبي تقري
قلت : لا
قال : اممممم ...امه اقرا لا تقرا عايزك تقري .. القرايه بتهدي الواحد...
هتساعدك ما تبقيش متسرعه هتساعدك تركزي ..
قام من مكانه واعطاني كتاب صغير
وقال : الروايه دي حلوه اقريها بس بالراحه اقري كل كلمه وركزي فيها...
وطلعي منها الكلمات ال مش مكتوبه صح وتقوليلي المره ال جايه العدد...
وحصل ايه معاكي في الشغل واشوفك اول الاسبوع برده ...
قمت وقلت : طيب الدواء اكمل فيه
قال : صحيح انتي اخدتيه كام مره
قلت : لا ما اخدتوش خالص محصلش واتخنقت تاني
قال : طيب كويس خليكي علي كده اما بس تحسي انك مخنوقه خديه وبرده المشي زي الاسبوع ال فات واهدي خالص انتي لسه بتقولي يا هادي
قلت : حاضر
قال : اشوفك الاسبوع ال جاي
قلت اوك مع السلامه
خرجت من العياده وكاني اولد من جديد فكره مختلف قررت ان انفذ فورا وقبل ان تطير الكلمات من راسي اشتريت مفكره وكتبت بها كل ما قال او ما اتذكره وانتظرت ان ياتي الغد كي ابدا التنفيذ
* معرفتش ارد علي تعليقات الجلسه ال فاتت بس ان شاء الله هرد عليها
وصف الاحساس
تحياتي

هناك 12 تعليقًا:

P A S H A يقول...

:)
تسلم الأيادي يا مبدعة

فيه نقطة إذا سمحتيلي لاحظتها اثناء القراءة .. بالذات في الفقرة "قال : سيبي ما بفهمش دي علي ... " أنها طويلة إلى حد ما - وإن كانت في سياق السرد المعتمد هنا على لغة الحوار - الأمر الذي أجهد تركيزي قليلاً في المتابعة .

دمتي بخير وسعادة

خالص تحياتي

وصف الاحساس يقول...

باشا
الله يكرمك علي جرعه التفاؤل دي
الحقيقه الفقره دي انا قريتها اكتر من مره واجدتني فعلا زيك تمام بس فكرت افصل مثل بين كل خطوه وخطوه بالسطور او مثلا بالارقام بس ماعجبتنيش فكرت افصل,مثلا برد اه .. طيب .. اوك
حسيت ان الفكره ال فيها هتتفركش, فحطيتها زي ما هي
انت تقترح تبقي ازاي طيب وانا اعدلها

فشكووول يقول...

ازيك يا وصف الاحساس
الكلام واضح وكله حكم
يعنى لما تعملى حاجه تعمليها بتركيز
واذا تاه الانسان فى وسطها ممكن يسيبها وبعدين يبتدى تانى
تحياتى

دعاء يقول...

اممم
أنا أفكر !
هذا أشبه بالحديث مع النفس ،
جميل :)
بانتظار البقية :)

تحيآتي لكِ ...

ظلالي البيضاء يقول...

طبيبك يا وصف أستاذ في التفكير السليم اللي احنا بنحتاجه في تحليل الأخطاء واكتشافها ومعرفة طرق العلاج سواء في الإدارة أو صيانة أعطال الآلات والأدوات أو في المواقف الإنسانية التي تحدق في المجتمع ..
يعني طبيبك مدير وفني وحلال مشاكل من الطراز الأول ..ههههه
تحيتي لك وشوقتيني أتابع الجلسات المقبلة ..
مع التحية الطيبة ..

بقاء رغم الشقاء يقول...

حديث مع النفس وكانها طبيب نفسى مبدعه ورائعه دايما ياوصف تحياتى

نيللي علي يقول...

جميلة ياوصف الأحساس ويارب تعرف تركز فى شغلها وتكون فى الجلسة التانية أهدي وأحسن

ومنتظرين الأجزاء القادمة علي خير:)

وصف الاحساس يقول...

عمو فشكول
وانا اقول المدونه منوره ليه اتاريك عندنا ومنورنا
فعلا التركيز اهم شيء كمان معرفه الاخطاء بيتساعد علي حلها
نورتني جدااااا
تحياتي

وصف الاحساس يقول...

دعاء
انتي الاجل يا قمر
انتظرونا
تحياتي

وصف الاحساس يقول...

ظلالي البيضاء
طالما دكتور نفسي يبقي لازم يبقي كل دول في بعض
انتظرونا في باقي الحلقات
تحياتي

وصف الاحساس يقول...

بقاء رغم الشقاء
شكرا ليكي يا قمر انك متابعه معايا
نورتيني جدا
تحياتي

وصف الاحساس يقول...

نيللي
شكرا ليكي يا حبيبتي وان شاء الله هتعرف تركز
نورتيني جدا
تحياتي