الخميس، 2 فبراير، 2012

انا مقهوره عليكي يا مصر

مش فاهمه ايه ال بيحصل ده ازاي روح علي روح تهون
قد كده سهل حد يقتل حد
قد كده سهل تشوف حد بيموت قام عنيك ويبقي الوضع عادي
ايه ده في اي زمن احنا ولا في اي بلد
ازاي كل ده بيحصل في وقت واحد سطو مسلح قتل مجزره بورسعيد كل ده واكتر
اقل من ساعه واتقتل 73 واحد عشان ماتش كوره
فين الامن والشرطه
الشرطه دي بتعمل ايه بتحمي مين بتحمي نفسها بس ولا ايه
لا قادره تامن بنك ولا ناس ولا حتي ماتش كوره
ما نحل جهاز الشرطه وكل واحد يحمي نفسه ولا نشوف ناس شريفه من كل بلد وشارع وحاره تحمي بلدها
معدش ينفع الطبطبه دي لطالح مين ده كله
لا تحقيقات بتنفع ولا قصاص بيتاخد ولا حاجه بقت امان
باقي ايه نخاف عليه ان كانت النفوس بتهون بالسهوله دي
من اقل من اسبوع اتقتلت في بلدنا واحده لقوها متكتفه ومدبوحه في بيتها ومسروقه ايه الوحشه دي فين الامن و الواحد يامن علي نفسه ويخرج من بيته ازاي واصلا يقعد ازاي وهو خايف حد يهجم عليه ويدبحه ومهما نادي محدش هيسمعه
الواحد يقضي شغل ازاي يطلع ولاده ازاي يعيش ازاي
ولو حصل وحد هجم عليك في بيتك قاصد يسرقك تعمل نفسك نايم وتسيبه يسرق وتنجي بحياتك مهو مفيش حد هيسمع
انا خايفه و مش عارفه اخرج من البيت بعد الحادثه واحداث امبارح دي فضلت قايده سهاره طول الليل وكل شويه اقوم اتاكد مفيش حد غريب في البيت
انا زيي زي كل الناس عايزه اغمض عنيا وانام من غير ما اخاف عايزه اسيب ابني في البيت او في مدرسه من غير ما اخاف حد يخطفه ولا يقتله
للدرجه دي معدش فيه خد في البلد شريف ماهو ال يشوف ال بيحصل ده وساكت يبقي زيه الساكت عن الحق شيطان اخرس
مفيش قاضي شريف يقول ان ال بيحصل في المحاكمات والراءات ده لعب عيال ويطالب بوقفها
مفيش رجل شرطه شريف يقول كده غلط احنا مالناش لزمه ما بنشوفش الامن مش بنقضي واجبنا
خلاص معدش فيه امان كل واحد يقعد في بيته ماسك سكينه ومستني حد ييجي يموته من غير ما حد يدري
قد كده ممكن حد يضحي بمصر كلها عشان مصلحته
انا حاسه بقهر علي الناس ال ماتت دي في اقل من ساعه من غير اي ذنب والكلاب ال قتلوهم دول ايه مش بني ادمين ولسه هيقولو تقصي حقائق وتحقيقات وكله يطلع في الاخر علي مفيش
حاسه اننا بنرجع لورا ايام ما كان مبارك يفجرلنا كنيسه ويوقع الناس في بعض عشان نتلهي عن عمايله
وننسي حكايه الانتخابات والتوريث
احنا بنتعاقب علي الحريه وعلي الحياه
حسبنا الله ونعم الوكيل
الله يرحمهم ويتقبلهم شهداء يارب

هناك 9 تعليقات:

نسرين شرباتي "أم سما" يقول...

والله ما عارفة اقول ايه
لا تعليق

نيللى يقول...

طول ماالفساد بيسري فى عروق مصر, طول ماأحنا هنتسمم,ولكن الله لن يتركهم.

حسبي الله ونعم الوكيل

بقاء رغم الشقاء يقول...

والله عندك حق ياوصف واحنا كمان مقهورين قوى على مصر وعلى دم الشهداء اللى راح هدر ربنا يحمى مصر وولادها من الفتن والابتلاءات

كريمة سندي يقول...

اللهم أسكنهم فسيح جناتك اللهم آمين

ولنا الله فهو حسبنا

همسة محبة يقول...

مش قادرة اقول الا حسبى الله ونعم الوكيل فى كل من يريد خراب هذا البلد قلبى متالم بشدةواشعر بغصة تكاد تخنقنى

dodo, the honey يقول...

انا لله وانا اليه راجعون
حسبنا الله ونعم الوكيل ...

أسأل الله أن يحتسبهم شهداء عنده ...

كلنا يحز في قلوبنا ما حلَّ بمصر ...

.....

صمت الورود Esraa يقول...

انا لله وانا اليه راجعون

حيبى الله ونعم الوكيل

صمت الورود Esraa يقول...
أزال المؤلف هذا التعليق.
ظلالي البيضاء يقول...

وصف ..
للأسف .. عناصر الأمن والشرطة والداخلية في البلاد العربية مهمتها هي حماية الأنظمة وليس حماية الشعب ..
ترقبي تدوينتي القادمة .. إكراماً لك .. سأرويها كقصة لأحافظ على سلامتي ولكنها قصة حصلت مع أهل زوجتي .. والقصة الثانية حصلت مع أمي ..

إنا لله وإنا إليه راجعون ..
ما تخافيش احنا معاكي روحي نامي .. ولو حد جالك عاوز يؤذيكي يبقى اكتبي على المدونة بتاعتك وإحنا نيجيه بالتعليقات نقضي عليه .. هه

كوني بخير ..