السبت، 20 مارس 2010

عيش اللحظة

احم ... احم ... احم   يمكن عشان انا نكدية او اتعودت علي النكد وبقي ملازمني زي ضلي وان غاب عني بحس ان في حاجة ناقصاني وافضل ادور .. ادور .. ادور لحد ما الاقيه وما احسش بالامان الا وانا نايمة ودموعي مغرقاني ..نكدية بقي هعمل ايه ..
ال بيحصل ايه .. والسبب في كدة ايه
انه انا مش ببص للحظة ال انا فيها لا ببص للوراها واشوف النكد جاي امتي وافضل استناه وانكد علي نفسي لحد ما يوصل بالسلامة
كتير حاولت اسيب النكد علي جنب شوية وما ابصش بعيد واسيبه يرتاح مني شوية
بس بلاقيه بسرعة هجم عليا وعلي تفكيري ما انا عارفة انها لحظات وهتنكد تاني
طبعا ساعتها بستسلم وبنسي كل ال حاولت اعمله عشان ما اتنكدش
فمن واقع التجربة النكدية بقول
ان كل لحظة في حياتنا بتبقي لحظة اخيرة
مش بس اخر لحظة في العمر هي اللحظة الاخيرة لا
الوقت ال بيعدي مش بيرجع تاني
واللحظة ال بتفوت مش بتيجي احسن منها
فمش معني ان ساعات او دايما بتيجي ساعات انتظار ممله نبقي نسميها وقت ولازم يعدي عشان ال بنستناه ييجي
لكن الوقت ال هو قيد الانتظار ممكن يكون مهم في حياتنا
الوقت ده جواه مشاعر كتير متضاربة
ممكن توتر .. ماهو ممكن تكون عامل عملة ومستني تشوف نتيجة عمايلك فقلقان وخايف من النتيجة
وممكن زهق ..زي ما تكون مستني وقت معين عشان خروجه ولا سفرية وقاعد علي دكة الانتظار
وممكن تكون شوق .. زي لهفتك وانت راجع من السفر نفسك تشوف اصحابك وحبايبك
اللحظات دي زي ما هي تقيلة علي قلب الواحد فليها اعتبارات تانيه ..جواها مشاعر واحاسيس تانية ممكن نستغلها عشان ما تبقاش تقيله كدة
مش لازم اللحظات دي تضيع كدة مجرد وقت بيعدي لانه ممكن فعلا يبقي مفيش وقت بعدها او تبقي فعلا اخر لحظات في العمر ما ينفعش تعدي او تكون عدت من غير ما نحسب لها حساب او نستفيد بيها ونرجع دايما نشكي ليه احنا كدة
ليه بقي النكد في دمنا ..وليه بقت الفرحة لحظات مش بنشوفها كتير
الكلام ده بقوله لنفسي قبل اي حد لاني فعلا نكدية من الدرجة الاولي ومش بكتفي بقي بشوية نكد ويعدو في سلام زي اي سحابة صيف لا والف لا
دي بتقلب المواجع والجرح ال لسه واجع وبتخلي كل حاجة حلوة مالهاش طعم
بتخلي الواحد يشوف الاحمر كحلي ..والاصفر بني وفي الاخر بقينا مسلمين للغرق وبقت حركة النفس مش سالكة وبقت الحياة جزء من البحر الميت مبقتش بتاثر فينا الامواج ولا الرياح
هييييييييييييييه دنياااااااااااااا
وصف الاحساس
تحياتي

هناك 4 تعليقات:

سمع هوص (Abo 3li) يقول...

اولا حمدالله علي السلامة وبلاش تغيبي تاني..
ثانيا النكد صفة طبيعية في المرأة.. هرمون الند عندها عالي.. بتتولد بيه.. زي عاطفة الامومة... بيكون عندها عاطفة النكد..
وان كان بيبقي درجات... من ست للتانية..
بس كلهم بيشتركو في الصفة دي...
فمتقلقيش علي نفسك... ده الطبيعي بتاع بنات حواء.. مهما حتي يثبتو العكس...

تحياتي

وصف الاحساس يقول...

اولا الله يسلمك

هههههههههههههه والله ضحكتني
تصدق قربت اصدق انه فعلا هرمونات في الدم
بس وماله نكدية نكدية
بس اعيش
نورت الموضوع
تحياتي

غير معرف يقول...

ههههههههههههههه

بيتهيالى سمع هوص عنده حق

بس احيانا بتبقى الحياة والظروف وحاجات كتيرة هى اللى بتخلينا نعيس المود وعامة هى بتبقى فترة وبتعدى

ربنا يفرحك داااااايما ياااااارب وتبقى كل ايامك فرح وسعادة

وصف الاحساس يقول...

star in the sky
اولا شرفتيني بزيارتك ليا ونورتيني جدا
ثانيا هو اكيد الواحد مش بيتمني او مفيش حد ما يتمناش يعيش سعيد
كلنا نتمني بس زي ما قال اونكل كاظم
ان الانسان بلا حزن زكري انسان
لازم ده شيء اساسي في الحياه
يعني انتي عمرك شفتي بحر من غير موج
هههههههههه
هي الدنيا كدة
ربنا يسعدك يا جميل وما تشوفيش نكد ابدا
تحياتي
نورتيني يا قمر