الثلاثاء، 15 نوفمبر 2011

حيطه سلف ...!!!

عايزه اخبط راسي في الحيطه محدش معاه حيطه سلف
سامعاك يالي بتقول
_ _ يعني من قله الحيطان ال في البلد
** لا معلش اعذرني اصل انا عايزه حيطه بمواصفات خاصه
_ _ استغفر الله حتي دي كمان فيها مواصفات خاصه صبرني يارب ارغي يا عم الامور
** بص يا سيدي وما ستك الا انا عشان بس تفهم الحكايه الحاله دي بتجيني كل فتره كده زي ما يكون الواحد بينسي شويه واما يرجع يفتكر تاني يدور علي حيطه سلف
_ _ انجزي يا حجه
** يا سيدي صبرك بالله بس عشان الكلمتين ال في راسي اه يا راسي والله راسي وجعتني من ال فيها واعصابي معدتش تتحمل كل ده
_ _ يا مصبر الوحش يا رب
** يوووه هتنسيني سيبني اتكلم براحتي هو الكلام عليه جمارك حتي الكلام هتحسبه عليا
_ _طب لخصي
** يا سيدي الحكايه ومافيها ان الدنيا دي مهما وسعت وفكرتها واسعه بلاقيها ضاقت واما تكون ضيقه اوي بلاقيها واسعه اوي
_ _ هبل هو ده ولا ايه ايه ال واسعه وبعدين ضيقه وضيقه وواسعه انتي هتخرفي يا ست انتي
** يا سيدي قلتلك صبرك بالله الحكايه اني اما بحس ان الدنيا بقت بقت واسعه علي ناس بتقف في وش ناس وتضييق اوي عليهم واما تضيق عليا اوي بلاقيها بتوسع اوي لغيري مش حقد ولا حسد بس نفسي افهم ليه احنا صنفين صنف ابن البطه البيضا وصنف ابن البطه الزفت السودا واغلبنا ابن الزفت السودا تلاقي نفسك طالع عينك علي حاجات من حقك وكل الناس عارفه ان ده حقك و شايفين ظروفك وحالتك المنيله ومحدش يقدر علي حاجه غير الله يقويك وتلاقي حد تاني لا في ظروفك ولا له حق في حاجه الدنيا معاه ماشيه اخر حلاوه
_ _ يا ستي ارزاق هتبصي للناس في رزقها
**اللهم لا اعتراض يا سيدي بس العدل مش كله كده ضلمه ضلمه واما نيجي نفرح تضيق في الاخر و ..
_ _استني هنا ايه دخل ده كله بالحيطه الزفت ال انتي عايزاها
** ما هو انت لو تصبر هتعرف ان السبب في ده كله حيطه
_ _ مش فاهم حاجه وخلصي في ليلتك دي
** بقي يا سيدي الناس ولاد البطه البيضه دول وراهم حيطه طول بعرض محدش يقدر يزحزحها ولابسه وش الفدائيين والملايكه وبتحمي ولاد البطه البيضه دول بكل قوتها وجمايلها ولسانها العسل ووش البراءه والنحنحه والمسكنه بصنعه لطافه يعني محدش يقدر يخشلها في حوار ممكن بيتقو شرها بيشترو خاطرها ساعات من تحت الدرس وساعات من ورا القلب وساعات مصالح يا عم صالح
انما ال زي حالاتي وراه البحر ومن قدامه العدو وهو لايص في النص مش عارف يعمل ايه ولا يروح لمين فبيدور علي حيطه يخبط راسه فيها يعلق عليها حموله وهمومه تسد عنه شويه
_ _ اقولك علي حاجه تيجي نقر عليهم
** وحياتك لو بياثر كنت عملتها
__ طب انتي عايزه مني ايه دلوقت
** هو انا بتكلم لاوندي عايزه حيطه اخبط راسي فيها
محدش معاه حيطه سلف
وصف الاحساس
تحياتي

هناك 11 تعليقًا:

ذو الوجه المبتسم يقول...
أزال المؤلف هذا التعليق.
ذو الوجه المبتسم يقول...
أزال المؤلف هذا التعليق.
ذو الوجه المبتسم يقول...

تعرفي البوست بتاعك ده فكرنى باخر رسمة رسمتها - اللى ف مدونتى
هتلاقيها زى ما هى محدش قرب عليها غيرك
عارفة ليه
كلام ف سرك انا مش بادخل مدونات حد الايام دى ومقصر ف حق كل الاصدقاء علشان كده هما كمان طنشونى

باقول لك ايه
معندكيش حيطة اخبط دماغى فيها هههههه

ذو الوجه المبتسم يقول...

معلش انا حذفت التعليق الاول بالخطأ بس هتلاقيه مكتوب ف الميل
ابقي اقريه بقي ومتقوليش لحد عليه ههههههه
تقبلى تحياتى

ظلالي البيضاء يقول...

أم محمود ..
لو يسرك أصنعلك حيطة خصيصاً علشان خبط الرؤوس .. بس حاعملها من الداكرون .. إنت عارفة الداكرون .. ده اللي زي القطن ناعم ولطيف بيعملوا منه مخدات وفرشات ولحف ..
علشان إحنا لو خبطنا راسنا بيه نرتاح مش نتألم أكتر .. هههههه
سلامتك ألف سلامة .. هو كلنا بندور على الحيطة دي ..
مع تحياتي ..

sabry abo-omar يقول...

كلمات معبرة عن حالة الضجر والمعاناة مع الحياة باسلوب ساخر ورقيق.. تحياتى لقلمك

وصف الاحساس يقول...

ذو الوجه المبتسم

جميل انك بتكتب بالرسم وده عاجبني اوي في مدونتك
ما تزعلش من صحابك يمكن مفكرينك ناسيهم
انت بس خد لفه لكل واحد سلم عليه هتلاقيهم كلهم لسه فاكرينك
انما الحيطه بقي انا ال محتاجاها ضروري والله بس ما يمنعش انه لو حتي لقين واحده نص كم هبقي اضرب دماغي فيها وبعدين ابعتهالك
التعليق لسه ما ظهرش في الميل اما يظهر مش هقول لحد عليه
نورتني جدا
تحياتي

وصف الاحساس يقول...

ظلالي البيضاء

ياااااه هو انتو لسه عندكو الداكرون ده
انا فاكره ان ماما كانت متجوزه بيه بس ما افتكرش انه لسه موجود
ممكن تتعمل من القطن عشان تبقي ناعمه وطريه وكلها حنيه هههههههه
نورتني جدا
تحياتي

وصف الاحساس يقول...

صبري ابو عمر
تحياتي ليك ولوجودك
شرفتني ونورت المدونه
تحياتي

Ms Venus يقول...

تصدقى انا كمان عاوزة اعمل كده يا وصف

وصف الاحساس يقول...

فينوس

سﻻمتك يا حبيبتي
الف بعد الشر عنك
وعموما انا لو لقيت واحده هعرمكو كلكو عليها