الأربعاء، 29 فبراير 2012

الجلسه الرابعة

دخلت العياده توجهت الي الركن الروز والابيض والاحمر جلست واشعلت الشمعة امامي جائني الدكتور وجلس بالمقعد المقابل لم يفتح ورقتي كما اتفق مع ولكنه ابتسم
قال : الحب الرومانسي
تنهدت ومددت بصري للشمعة امامي وقلت : نفسي احب واتحب ... نفسي الاقي انسان يحبني واحبه ... انام علي صوته... اروحله اشكيله همي ... اتصل بيه وقت ما احتاجة والاقيه ...احس اني مهمة بالنسبه له ...احس ان في حد جنبي يخاف عليا
قال : فكرتي هتقابليه ازاي
قلت : حلمت بيه في الشارع يشوفني ويكلمني ...
حلمت مرة انه معايا في الشغل ومعجب بيا...
حلمت بحد اشوفه في محل وانا بتسوق ....
حلمت واستنيت دورت في كل الوشوش ... دورت جنبي مفيش ... حاسه اني عمري ما هلاقي الحد ده ...
قال : الانسان ال يحبك تحبي يحبك ليه .. عشان شكلك ..ولا جسمك ..ولا عشانك انتي انسانه كويسه وروحك حلوة
قلت : اكيد عشان انا كويسه وروحي حلوة
قال : ال هيشوفك في الشارع او في محل او هيمشي وراكي ده مش هيشوفك عشان كده .. الانسان ال تامنيه علي حياتك لازم يقدس الحياه دي ... لازم يكون انسان متزن يعرفك كويس ... ما يكلمكيش في الشارع مش قاصد يشغلك بحبه ... قاصد تكوني زوجته وحبيبته وشريكة عمره ام اولاده تكملي معاه حياته ..
قلت : جواز صالونات
قال : مش عيب ابدا ان ال عايزك يجيلك بيتك ....اتكلمي معاه اعرفيه قدام الناس والدنيا كلها ... جايز يكون زميل في الشغل.... بس برده يكلمك في بيتك مش في الشارع ... يدخل بيتك من بابه
قلت : تفتكر كده ممكن يبقي في حب
قال : مش هكدب عليكي .. الجواز مش كله حب ومش كله وحش ... ما تعيشيش وهم انك تلاقي انسان كامل... مفيش ملايكة علي الارض ... ال هتكملي معاه حياتك هو زوجك ... هو ده ال هيبقي حبيبك وزوجك وصديقك وكل حاجة ... يعني مش كل حياتك هتبقي حب ..ولا نكد.. ولا خروجات ... ولا طبخ وغسيل ...
الحياه الزوجيه دنيا ... مش تجربه هتعيشيها دي عمر دايم ... وبعدين اما تبقي زوجه هيبقي عليكي واجبات ناحيه زوجك ... لو ما عملتيهاش ربنا هيحاسبك عليه ... وهيبقي ليكي حقوق عليه لازم تعرفي حقك فين ...عايزك تشوفي الصورة كامله ... اقري عن المودة بين الازواج ... طاعة الزوج ... اسمعي تجارب الاخرين ...ارسمي شكل لحياتك بعد كده ... وحاولي تتقبليه نفسيا ... عشان ما ترسميش حياه تتمني فيها الحب وتفاجئي بكم مسئوليات تغرقك وتشيلك الهم ... وتقضي باقي عمرك ندمانه علي حاجة انتي مش عارفاها ومش هتقدري تغيريها ...
اكتابت وقلت : يعني مفيش امل اعيش قصة حب زي الناس
قال : اكيد فيه امل طبعا بس عشان القصة دي تستمر شوفي الحلو فيها والوحش .. شوفي لحظات الحب .. ولحظات المسئوليه ... اعملي حسابك علي كل حاجة عشان تقدري تحافظي علي حبك
قلت : اعمل ايه يعني
قال : الاول تختاري انسان كويس ... يعرف ربنا ترتاحيله نفسيا تتقبليه في اي وضع هو ده اخرك مفيش غيره في حياتك ...تنمي في نفسك القدرة علي القيام بمهام الزوجيه ... هتبقي مسئوله عن بيت وزوج وابناء ... رتبي نفسك وحطي خطة لكل حاجة ... هتعتني ببيتك ازاي ..زوجك ... نفسك في الاول ... اهل زوجك ...اهلك شغلك ...كل حاجة حطيها في الصورة
قلت : طيب ممكن اتمني يكون شكله حلو وامور
ضحك وقال : الشكل ده حاجه محدش له دخل فيها ... هتحاسبيه علي امر ربنا ... ممكن تقولي شكله مقبول ... انما حلو بقي وامور وشبه كريم عبد العزيز ولا احمد عز لا ...دي يابنتي عينات بس مش موجود منها كميات.... هي نسخه واحده عشان كده بيعرضوها في التليفزيون ... بعدين اما تحبي حد هتشوفيه اجمل انسان في الدنيا حتي لو كان اوحش واحد في نظرك...
قلت : بصراحة اديتني دفعة اكتاب محترمة
قال : انا بنقذك من اكتاب ممكن تعيش فيه عمرك كله ... اغلب البنات والشباب بيفكرو ان الجواز ده حب ورومانسيه وشويه حاجات تانيه ... لا هو كتير من الحاجات التانيه دي وشويه رومانسيه كده ...
قلت : يعني فيه امل
قال : الامل في ربنا كبير .. شدي حيلك
ضحك وضحكت معه انهي الجلسه وذهبت افكراسترجعت حياتنا لم اذكر ان سمعت ابي يقول لامي احبك ...كل حياتنا ليس بها طعم للحب ... اخذت بنصيحته وذهبت اشتري كتاب عن الحياه الزوجيه وقررت ان ارسم الصوره كامله ولعله خير
وصف الاحساس
تحياتي

هناك 13 تعليقًا:

حنين محمد يقول...

مساء الغاردينيا وصف
الحياة الزوجية فعلاً ليست كلها حب ولكن لايعني إنعدام الحب ولكن بـ جانب الحب مسؤليات أكبر زوج وأبناء ومنزل صغير يحتاج لجهد من الطرفين والإبقاء على نكهة الرومنسية هي مسؤلية الزوجة والأهم أن تعود زوجها على كلمة " أحبك " تلك الكلمة التي يفقدها الزوجان هي سبب فتور الحياة الزوجية التي تستحق الكثير من الحب "
؛؛
؛
في أنتظار قرائتك للكتاب :)"
؛؛
؛
لروحك عبق الغاردينيا
كانت هنا
reemaas

هبة فاروق يقول...

بصى يا وصف
الجواز عن حب من اجمل الاشياء يجعلك تضحين وتتنازلين وتستمر الحياه مهما كانت عصيبه من اجل هذا الحب
والحب فعل وليس كلام
رزقك الله بزواج عن حب
وفى انتظار تعليقك على كتاب الحياه الزوجيه

P A S H A يقول...

"وذهبت أشتري كتاب عن الحياة الزوجية" بعد أن جعلتينا نقرأ في كتاب الحياة :)

حالياً ما عنديش تعقيب مناسب ومش هاتكلم عن أسلوبك البديع كالعادة ووصفك الرائع يا أستاذة .. لكن بجد أحب أشكرك وأحييكي على تناولك للموضوع بالشكل الناضج ده :)
برافو برافو والله

دمتي مبدعة ومتألقة

دعاء يقول...

عزيزتي وصف ..

متابعة ..

ملاحظة / تركت لكِ تعليقًا على " قصة حياة " ..
بانتظاركِ ..

تحيآاتي لكِ ..

صبح يقول...

اسمعي كلام الدكتور لاانو معاه حق

بس احلمي بردو و حاولي تعيشي مع جوك ان شاء الله الحياة بحلوها و مرها برومانسيتها و بقسوتها و خلي ربنا قصاد عنيك و ختاما تحياتي لك

Tamer Nabil Moussa يقول...

ابدعتى وصف
بجد تسلم ايدك

مع خالص تحياتى

وصف الاحساس يقول...

ريماس
تحدي كبير استمرار التعبير عن الحب بعد الجواز
ممكن يكون موجود في القلب لكن التعبير عنه مش باستمرار
وبيتهيالي صعب تعودي حد علي كلمه هو مش مهيا يقولها
جايز العيشه مره بس بنحاول علي قد ما نقدر نحلي مرارتها
والامل موجود في كل الاحوال
نورتيني يا قمر
تحياتي

وصف الاحساس يقول...

هبه فاروق
فعلا الجواز عن حب اجمل شي
انا وزوجي اتعرفنا عادي ناس عرفونا علي بعض و اتقدملي ووافقت والحمد لله عشان قصه حب جميله بس انتي عارفه المسؤليات بعد الجواز بقينا بنسرق لحظات نقول كلمتين حلوين هههههههه واي ماشيه
تحياتي

وصف الاحساس يقول...

باشا
شكرا ليك جدا
لو في تعقيب مستنياه
تحياتي

وصف الاحساس يقول...

دعاء
منوراني دايما
علي فكره رديت عليكي ‏
تحياتي

وصف الاحساس يقول...

صبح
الحياه مستمره رغم الحلو والمر
بس بنحاول علي قد ما نقدر نحلي المر
او حتي نعديه
نورتيني يا قمر
تحياتي

وصف الاحساس يقول...

‏ تامر نبيل
شكرا ليك يا تامر
منورني دايما
تحياتي

P A S H A يقول...
أزال المؤلف هذا التعليق.