الثلاثاء، 6 مارس 2012

ثم قالت له امريكا ... حنفي ...!!

يؤكدون دائما ان مصر لن تركع ابدا .. وهمونا بانهم رفضو اسلوب الذل في قبول المعونه فاخذتنا الشهامه وقال المصري انا المعونه ورفعنا انوفنا في السماء مؤكدين ان مصر لم ولن تركع ابدا ... وجاءت الطامه الكبري الاجانب الممنوعين من السفر في قضيه التمويل الاجنبي للمنظمات الغير شرعيه ... وشد وجذب ودائما نقول مصر لن تركع ابدا وفجاه تنحت اللجنه القضائيه لاستشعارها الحرج بعد طلب رفع منع السفر عن المتهمين الاجانب
وتم رفع المنع و تم الاستعداد لمغادره البلاد
وخلال يوم كامل ينوه التليفزيون عن سفر المتهمين الاجانب البلاد الي ان سافرو
وكان كل القوي السياسيه كانت تنتظر السفر كي تشجب وتندد وتتهم الحكومه بالخيانه
يوم كامل ولم يتحرك احد ... لم يعتصم احد في المطار ... ولم يقطع احد طريق عربات الشرطه التي تحميهم ... ولم يظهر احد يقول امنعوهم من السفر ... ولكن بعد ان سافرو بالسلامه ... انفرجت شفاه الجميع ونددو بقوه بما حدث واتخذو وضع " المضروب علي قفاه "
وبدات البلاغات تنهال علي النائب العام وبدءت مهاجمه الحكومه وتخوينها والبحث عن من المسئول ..وجاءت الحكومه امام مجلس الشوري... والقت البيان الوزيره المعمره في حكومات مصر كلها ورفضت اتهام الحكومه بالتخوين " ال هو اقل واجب " وبررت صفقه التمويل وقالت انها فخوره لادائها في هذه القضيه او المسرحيه ويبدو انها ليست الجهة الوحيده التي عقدت الصفقه
ومازال التاكيد قائما مصر لن تركع ابدا قالها الجنزوري عده مرات ولكن ..
عندما قالت له امريكا .. حنفي ..
قال " خلاص ... هتركع المره دي .. لكن المره ال جايه .. عمرها ما هتركع ابدا .."
والجدير بالذكر ان السفاره الامريكيه تعهدت باستلام اي اخطارات تخص المتهمين في القضيه " قال يعني اما ينطلبو هترجعهم مصر مش هتطلعلهم لسانها وتقول مامتك في العش ولا طارت "
اري العجز في حاله الحكومه واضحا
احداث تجر الاخري تؤكد ان حكومه الانقاذ عاجزه .. مصر بلا حكومه والله اعلم بما في نوايا مجلس الشعب ..والشوري .. والقضاء .. والمجلس العسكري والشعب بالمره
اري ان مصر قامت للثوره وخرجت من تحت قبرها تنفض ترابها فجات تقف ما قدرتش " فرجعت قعدت تاني علي طول "
يا ثوره ما تمت

هناك 6 تعليقات:

Tamer Nabil Moussa يقول...

معلشى ياوصف الحكومة غصب عنها وقالت تنزل المرة دى والمرة الجاية لايمكن هه

الواحد بيحس بلخبطة فى الحكومة او نقدر نقول رجال الحكم الان عموما محدش بيعرف يخد خطوة وان خدها بتكون كارثة

ربنا يصلح الحال

مع خالص تحياتى

أمة الرحمن يقول...

مفيييييييش حنفى

الموضوع واضح والبلد لسه تكيه بيتصرفوا فيها زى ما يحبوا بس الحكاية ان الاول كانوا بياخدو خيرها دلوقتى وبعد الثورة قالوا فيها لا اخفيها وبدأوا من يومها فى اخفيها

للبلد رب يحميها مبقاش فى ايدنا غير اننا نقول كده

الواحد يبعد اد ما يبعد واول خبر يسمعه بعد مده يلاقيه اسوء من اللى كان يادى النيييييييله

لنا الله

دمت بخير وصف

mohamed amer يقول...

قلبتي علينا المواجع والجرح لسه واجع
حسبي الله ونعم الوكيل
وربنا ان شاء الله يخلصنا من حنفي

وصف الاحساس يقول...

تامر نبيل

فعﻻ انا حاسه ان اي حد بياخد خطوه بيبص قدامه ووراه وحواليه وخايف يخطيها كانه بيعمل عمله وكاننا لسه ما اتحررناس
ربنا يستر علي البلد دي من ال جاي
نورتني جدا
تحياتي

وصف الاحساس يقول...

امه الرحمن
للاسف حاسه ان دم الناس ال ماتت دي راح هدر عشان ناس ما تستحقش تاخد حق ناس تستحق وعشان حكومه عاجره تتمسك في الحكم وهي مش قادره تتصرف
مش اخره اﻻخبار المنيله دي ايه واحنا رايحيين علي فين ربنا يستر
نورتيني يا قمر
تحياتي

وصف الاحساس يقول...

محمد عامر
حاسه ان المواجع مش راضيه تخلص ومفيش حاجه بتحصل تحلي اﻻيام المره واﻻحداث المخزيه دي
حسبنا الله ونعم الوكيل
ربنا يستر ويعديها علي خير
نورتني جدا
تحياتي