الخميس، 14 يونيو، 2012

وكاله انباء ام خليل .. !!

ايها الساده جائنا البيان التالي
الست ام خليل كانت بتنشر الغسيل عادي زي كل يوم سمعت خبر زي الفل خلاها واقفه في البلكونه تغني وتقول
والثوره خوخه .. اااه .. جات بعد دوخه .. اااه
مما اثار فضولنا لنعرف السر في هذه الحاله فاتجهنا مباشره الي منزل ام خليل وقمنا بعمل الحوار التالي
_ ازيك يا ام خليل
ام خليل : ازيك يا بني .. وانت عامل ايه
_ الحمد لله .. مالك يا ست ام خليل فيه ايه
ام خليل : ماليش يابني مبسوطه وبغني .. اااه حد له عندي حاجه
_ اصل الناس اشتكت منك
ام خليل : ناس ناس مين يابني
_ الشعب يا حجه
ام خليل : الشعب ده يابني ابن حرام ابن حرااااام
_ ليه الغلط ده بقي
ام خليل : انت يابني مش مصدق ... انتخابات باطله وعزل باطل ومحاكمه باطله .. وثوره باطله ومجلس باطل .. كله باطل باطل .. يبقي الشعب ايه ...
_ ابن حرام
ام خليل : الله ينور عليك
_ لا استني .. طب ايه ال خلاكي تقولي كده
ام خليل : بص يابني مصر ام الدنيا .. صح
- صح
ام خليل : طب فين ابوها .. مفيش .. الشعب ما استحملش فضل يصرخ زي يسرا في الفيلم بتاع شاديه ويقول .. انا ابن حرام .. انا ابن حرم
جات نعيمه عاكف وضحكت بخباثه وقالت
ههيء نكته دي
قام جات النكته قلبها وجعها علي الشعب راحت قايله انت ابني انا .. ابني اناا
فطلع علي الشعب انه ابن نكته .. وصدق وعاش وراحت الايام وجات الايام وطلع جواز عتريس من فؤاده باطل .. ورجعنا لنفس النقطه الانتخابات باطله .. الثوره باطله .. العزل باطل .. كله باطل .. رجع افتكر اصله وفصله .. فطلع الشعب ابن حرام .. ايه ال جبرنا احنا علي الثوره .. ثوره ايه ال مشينا فيها دي .. كنا متهنيين ماتش كوره يفرحنا .. فيلم العنب يمزجنا .. وفي اخر الليل نغني دقيقه حداد .. نقوم نروح نتبطر علي حالنا ونعمل ثوره .. والثوره خوخه .. ااه ... جات بعد دوخه
يروح العيال فطيس وتطلع الثوره باطله وكل ال يتنسب ليها باطل ماهو مفيش شرعيه ثوريه
_ لا حول ولا قوه الا بالله .. طب تحبي تقولي ايه في نهايه الحلقه
ام خليل : احب اقول لكل المصريين .. ما نجيلكوش في ثوره .. ههيييييي... وكمان اقول كل ثوره وانتو طيبين .. والثوره خوخه .. اااه جات بعد دوخه .. ااه
_ وهكذا ايها الساده تظل ام خليل علي هذه الحاله والسؤال الان هل سندخل الثوره الجديده وام خليل لسه بتغني في البلكونه ولسه الشعب ابن حرام ولسه العزل مش شغال والانتخابات باطله .. يخرب بيت كده كل ده .. اقولكو كل ثوره وانتو طيبين .. والثوره خوخه .. اااه جات بعد دوخه .. ااه

احمد احمد .. اعقل يا احمد انت علي الهوا .. الله يسامحك يا ام خليل جننتي الراجل
كنا معكم من بيت ام خليل و انباء ام خليل
وصف الاحساس
تحياتي

هناك 9 تعليقات:

ريـــمـــاس يقول...

مساء الغاردينيا
وستبقى مصر أم الدنيا
وستنهض يوماً ما
كوني أكيدة سيشرق فجر الحرية بعد ظلام "
؛؛
؛
وصف دائماً تجيدين الوصف كما يمليه إحساسك
لروحك عبق الغاردينيا
كانت هنا
Reemaas

د.ريان يقول...
أزال المؤلف هذا التعليق.
د.ريان يقول...

مساء النور وصف الاحساس

وقصة مؤلمة رغم كوميديتها

إذا كان رضى الناس غاية لا تدرك

فكيف بـ أكثر من ثمانين مليون

من الناس ,ماسوف يحصل هو قضاء الله

وقدره وسيخرج شعبنا الطيب من تلك

الأزمة فقد خرج من أصعبها

سرني المساء هنا سيدتي

ورائعة دائماً بكل جديد

ظلالي البيضاء يقول...

يا خوفي يا وصف المجلس العسكري يتعلم من بشارنا أن يقصف الشعب والمدن ليبقى محافظاً على مكانه على رؤوس الشعب ..
فقد وعد بشار أن يعلم الآخرين الدروس في السياسة ومعالجة الأزمات ..
وأخشى أن يكون المجلس العسكري قد تعلم الدرس فعلاً ..

همسة محبة يقول...

يظهر ياوصف ان ام خليل واحمد ركبوا اللمونة ودوخينى يا لمونة ربنا يستر وتعدى

وصف الاحساس يقول...

ريماس
مصر ام الدنيا تتالم ومفيش حد عارف يداويها
ربنا يستر وتعدي الايام دي علي خير
اشكرك حبيبتي
نورتيني جدا
تحياتي

وصف الاحساس يقول...

د ريان
محدش بيرضي غير بال يريحه مش مهم علي حساب بلد كلها المهم ان مصلحته تنقضي وتفضل تنقضي
ربنا يستر
نورتني جدا
تحياتي

وصف الاحساس يقول...

ظلالي البيضاء
المجلس العسكري مش محتاج حد يعلمه هو بيعرف يطلع من كل حاجه باقل خساير
والحمد لله انه لسه محافظ علي البلد
ربنا ينصر سوريا علي السفاح بشار
ويهدي المصريين لطريق سليم
نورتني جدا
تحياتي

وصف الاحساس يقول...

همسه محبه
والله كلنا دايخين ورا اللمونه .. وتعبنا من اللف والدوران
ربنا يعدي الايام دي علي خير
نورتيني يا قمر
تحياتي