هل رايتم مطروح

امبارح رجعنا من رحله لمطروح لمدة خمسه ايام
من اول لحظة دخلنا فيها مطروح والدنيا غير الدنيا
الجو غير والهوا غير حتي القر مختلف

دي صورة من قدام الشاليه علي طول .. المصيف شاليهات علي البحر

دي صورة محمود في المايه علي العوامة
ده في شط الغرام المياه صافيه لدرجه جميله جدا والرمل ابيض بشكل فظيع
احنا روحنا شط روميل وده احلي شط شفته والغرام ونزلنا شط الشاليه
اطرف حاجة ان واحنا في البحر قدام الشاليه محمود كان في المايه عادي واحنا جنبه هو في العوامه واحنا معاه ال حصل بقي انه فجاه لقينا محمود نايم في العوامه .. يا حودة يا حودة مفيش فايده
طلعناه ونيمته في السرير ولانه كان غرقان ميه غيرتله هدومة وانا بلبسه صحي ومرضاش ينام تاني خالص لحد ما نمنا زي كل يوم

الصور دي كنا في رحله في البحر من الشاليه لحد روميل ورجعنا تاني
محمود طبعا مسبش حاجة في مكانه راح ناحية الدفة ال صاحب المركب بيلفها وده يلف يمين ومحمود يلف شمال لازم يسيب بصمته في كل حاجة حتي الاوتوبيس طلع علي عجله القياده وشاف شغله لازم يسوق هو كمان

ده شط عجيبه يخوف جدا من فرق الارتفاع بين الطريق فوق والشط تحت
الصخور هنا شكلها جميل جدا تشوفها من قريب حاجة ومن بعيد حاجة تانيه خالص

محمود نام من اول ما طلعنا في الاوتوبيس لحد ما روحنا عجيبه وقبل ما نمشي صحي طبعا كان لازم نصورة حتي لو نايم

ده المنظر من تحت علي الممر ال علي الصخور بجد مرعب
اكتر حاجة تضايق في مطروح انها مفيش مايه حلوة للشرب مياه مطروح مالحه حتي في البيوت معرفش هما بيعملو ايه في الاكل والشرب لان شرا المياه مكلف جدا

حاجة لاحظتها في الطريق
القمر في اسكندريه واحنا رايحين كان نص القمر في مطروح بيتهيالي علي ما نوصل ليبيا هيبقي بدر عشان كده ممكن ليبيا فعلا تصوم قبلنا بيومين تلاته

حاجة كمان
كميه قري سياحيه علي الطريق ومباني معماريه تحل ازمة اسكان مصر كلها
طبعا مهما قلت مش هقدر اوصف جمال البلد دي ال حاسه انها مهمله في اكتر من حاجة رغم انه بصراحة كان نفسي اقعد هناك علي طول من جمال مطروح

وصف الاحساس
تحياتي