الأربعاء، 5 سبتمبر 2012

قصص اطفال

النمله سوسو

علي كان بيلعب مع الاولاد في المدرسه وهو بيلعب شاف النمله سوسو ماشيه بسرعه .. خاف من شكلها الاسود وحجمها الكبير فقال :اموتها عشان ما تخوفش حد تاني ..وهوووب راح رافع رجله ونازل فوقها .. سوسو كانت رايحه تدور علي اكل لولادها .. فجاه لقت رجل كبيره كده بتترفع هتنزل فوق راسها .. راحت قعدت تجري وتهرب منها .. علي شاف سوسو بتجري فضل يجري وراها كل شوي عايز يموتها. .. سوسو قالت : لا ده انت مصمم بقي يا ولد يا صغير .. طيب انا هوريك .. راحت جايه سوسو من وراه وراحت ماسكه في البنطلون بتاعه وطلعت علي رجله وراح قرصته ونطت علي الرمل وطلعت تجري واستخبت جوا الرمل .. علي اما النمله سوسو قرصته قعدت يعيط ويصرخ اااي اااي صحابه
قالوله : مالك يا علي ..مالك يا علي وهو بيعيط وراح علاء صحبه منادي للابله هبه
قالها : الحقي يا ميس علي بيعيط جامد اوي .. راحت الميس لعلي واخدته من الارض ومسحت دموعه و
قالتله : في ايه يا علي مالك بتعيط ليه .. علي مسح دموعه
وقالها: نمله كبيره قرصتني ..
قالت الميس : ازاي يا علي النمل ده طيب مش بيقرص حد راح علي حكالها الحكايه مع النمله سوسو
الميس قالتله : طيب تعالي يا علي الفصل واخدت علي وصحابه وقعدت ووسطهم
وقالت : بصو يا حبايبي علي غلط انه حاول يؤذي نمله ماشيه في حاله .. هي ما حاولتش تؤذيه عشان يؤذيها .. هو ال بدء معاها .. يعني هي مكنتش هتقرصه لو هو ما حاولش يموتها ... عشان كده يا حبايبي لو شفت نمله ضعيفه .. قطه صغيره اي حيوان ما عملكش حاجه .. ما تحاولش تؤذيه لانه ده روح زيك بيحس و عنده اولاد مستنيينه ولو حاولت تؤذيه هو مش ميسيبك وهيؤذك هو كمان .. صح يا علي ..
قال علي: صح يا ميس
وبصت للولاد كلهم وقالت : يعني اما تشوف قطه صغيره في الشارع هنعمل فيها ايه
قالو : مش هنضربها ولو معانا اكل هنديها
قالت : ولو شفت نمله ماشيه في حالها ما عملتلكش حاجه
قالو : مش هنقتلها
قال علي : خلاص يا ميس انا مش هعمل كده تاني
واتعلم علي وصحابه ان الحيوان ده كائن ضعيف وطالما ما عملناش حاجه يبقي هو في حاله واحنا في حالنا

********

الغزاله نونا والاسد الشرس
كان هناك رجل يرعي قطيع من الغزلان يحبهم ويحبوه .. كان من بين هذه الغزلان غزاله اسمها نونا واخري توتا كانتا صديقتان جدا جدا .. في يوم من الايام نزل الوادي اسد شرس فاجا الغزلان فاصبحو يجرو في كل اتجاه هربا منه ولكنه استطاع ان يهجم علي الغزاله توتا ويصطادها .. حزنت نونا كثيرا عليها وحزن الراعي والغزلان واراد الجميع التخلص من الاسد الشرس ولكنهم كلهم خائفون منه الا الغزاله نونا التي تريد الثأر لصديقتها فاخبرت الجميع ان لديها فكره للتخلص من الاسد الشرس فستكون هي الفريسه لاصطياد الاسد .. خافو عليها ولكنها اصرت جدا .. فاقام الراعي شباك حول محموعه من الاشجار وانتظرت الغزاله ظهور الاسد واخذت تجري امامه في خوف واصرار علي ما تريد الي ان وصلت لمجموعه الاشجار فقفزت خلفها في خفه ولكن الاسد لم يلاحظ وجود الشباك وقفز داخل الاشجار يلحق بالغزاله فوقع في الشباك ووقع في الفخ فتجمعت الغزلان سعيده بها النصر واستدعي الراعي سياره الحيوانات فاخذت الاسد في قفص كبير لتبعده تماما عن الوادي .. فرحت كل الغزلان برجوع الامان للوادي ولكن نونا كانت حزينه علي توتا جداا جدا

*********
وصف الاحساس
تحياتي

هناك 4 تعليقات:

mohamed يقول...

لا استنى علينا كده بقى بالراحه يا باشمهندسه علشان اعلق على موضوع النمله سوسو الأول وبعدين نشوف بقى قصة الغزاله نونا :
أنا أول ما شوفت انك منزله موضوع قصص اطفال قلت يا فرج الله هلاقى قصص جديده احكيها لعمر لكن بعد ما انتهت القصه قلت يا نهار ابيض دا انا لو جيبتله سيرة القصة دى هيقلب البيت رأس على عقب , دا هوايته اصلا انه يموت النمل ( ابتسامه )

نيجى بقى لقصه الغزاله نونا
يا ماشاء الله انتى عايزانى اقول لعمر ان الاسد الشرير قدر يفترس الغزاله توتا ( يبقى من أول القصه هيعيط ) .

بجد هما قصتان رائعتان ولكن اسمحيلى ان انقلهم بتصرف ( لأنى اعرف عمرى جيدا )

تحياتى اختنا العزيزه - دمتى مبدعه

نسرين شرباتي "أم سما" يقول...

:)
جميلة جداً القصص
يا بخت حودة بيكي :)

وصف الاحساس يقول...

ا / محمد
اولا ربنا يخليلك عمر
ثانيا زعلتني علي النمل ده اصلا كلنا بنعمل كده بس لازم تحكيله القصة وتقولي انطباعه عنها
بالنسبة للغزاله نونا ده عمر وخلص وقضاء ربنا هههههههههه الله يرحمك يا توتا
كنت ناويه انزل قصص اطفال كتيييير بس شكلها مش مقبول فتراجعت عن الفكرة ممكن تقرا قصة حياه كورومبه وتحكيهاله
نورتني جدا
تحياتي

وصف الاحساس يقول...

نسرين
ثانكس بيبي
بس حودة لسه مش بيحب يسمع حداويت
نورتيني يا قمر
تحياتي