السبت، 8 سبتمبر، 2012

ام سحلول عندنا يا مرحبا يا مرحبا

دخلت ام خليل بيتها في عز الضهر تحمل برميلا ثقيلا بين يديها فتجد خليل وسناء اخت خليل جالسين في الصاله امام التليفزيون
فيقول خليل : ايه يا اما ال انتي جايباه ده .. مش ده ولا ايه
ام خليل : مش ايه يا منيل اسكت ده في عفريته .. ام سحلول
خليل : يا اما هو البيت ناقص عفاريت .. ودي هتقعد فين ولا ظروفها ايه
تضع ام خليل البرميل بحرص علي جنب بينما تصتنت ام سحلول للكلام بحرص
ام خليل : البيت كله تحت امرها
خليل : منورانا يا اما والله ..منور يا حج .. قومي يابت اعمليلي كوبايه شاي وشوفي ستك العفريته تشرب ايه .. يحدث اخته سناء
ام خليل : جري ايه يا ولا ما تتادب شويه عندنا ضيوف
سناء : اه اتادب شويه احسن اخلي العفريته تعفرتك
ام سحلول تشعر بالنشوي بالكلمتين دول وتقول في نفسها : ايوه يا بت يا سناء شكلنا هنبقي اصحاب
ام خليل : بس يابت دي حالتها النفسيه تعبانه ومكتئبه ومش مستحمله .. وعايزين نفرفشها شويه
ام سحلول في نفسها : ليه كده يا ام خليل ده انا كنت هنسي واعيش عيشه العفاريت تاني
خليل : يعني يا ربي حتي العفريته ال جايالنا تعبانه نفسيا .. يعني لا تعرف تقول شبيك ولا لبيك ولا ال انت عايزه بين ايديك ولا حاجه
ام سحلول باستغراب : ايه ده هو لسه في عفاريت من بتوع شبيك لبيك دول اتلغو من زمان اوي
ام خليل : قوم يا واد من هنا احسنلك
يقوم خليل من مكانه بينما سناء تمصمص شفايفها و
تقول : يا عيني عليا كنت هلاقي عفريته تعملي عمل والاقي حد يتجوزني .. يدق جرس الباب
ام خليل : قومي يا بت افتحي الباب لخالتك ام متحت
سناء : ودي ايه ال جابها دي يا اما
ام خليل : جايه تشوف ام سحلول
سناء : يووه يا اما انتي لازم تحشري ام متحت دي في كل حاجه دي وليه فقريه وعينها وحشه
ام سحلول تضع يدها علي راسها وتقول : خمسه وخميسه عليا... الله يسامحك يا ام خليل جايبالي وليه عينها وحشه
سناء تفتح الباب لام متحت التي تندفع ناحيه ام خليل لتبحث عن ام سحلول
ام متحت : هي فين يا ام خليل العفريته
ام خليل تمص شفايفها : ما تقوليش عفريته قولي ام سحلول .. وبعدين هي في البرميل ده
ام متحت : طيب يلا طلعيها خلينا نتفرج عليها ولا تعملنا شويه حركات تسلينا
ام سحلول تمسك قلبها بايدها وتقول : حركات ايه يا ام حركات .. هي مين دي يا وليه ال عايزة تتفرجي عليها
ام خليل بنفاذ صبر : جري ايه يا ام متحت بنقولو الوليه تعبانه نفسيا وعايزين نفرفشوها وبعدين ممكن تكون نايمه ومش هتصحي دلوقت
ام متحت : طيب يا اختي انتي اش عرفك انها نايمه يعني
ام خليل : اصلها ما اتحركتش من ساعه ما جبتها من عند ميرووو
ام متحت : الا قوليلي هي ايه ال تاعب نفسيتها كده ومخليها مكتئبه
ام سحلول : الله يسامحك يا ميروو كده كل الناس عرفت اني مكتئبه ما بقاش غيرك انتي كمان يا ام متحت
ام خليل : ابدا ياختي ال فهته انها كانت علي علاقه باحمد ولا ضياء والاتنين ادوها بمبه و..
ام متحت : اعوذ بالله اتنين هي ممكن العفاريت تعمل علاقه مع اتنين ولا ايه
ام سحلول : قطع لسانك يا ام متحت ده انا اشرف من الشرف
ام خليل: لا يا وليه واحد واحد وبعدين سابت احمد بيان اكتشفت انه بيضحك عليها راحت لضياء قالها فكك مني
ام سحلول : اااااه يا قلبي الله يسامحك يا ميروو اوري انا وشي للناس ازاي دلوقت
ام متحت : طيب يا ختي والنبي ده متحت ابني شاب طول بعرض ببياض بحلاوة نعرفهم علي بعض وال فيه الخير يقدمه ربنا
ام خليل : اييييييييييييييييييه ابنك سواق التوك توك ده عايزاه يمشي مع ام سحلول
ام سحلول : الله ده فيها متحت .. استني كده يا ام خليل
ام متحت : ماله متحت يا اختي مش احسن من خليل بتاعك ده ال لا شغله ولا مشغله
ام خليل : لا يا حبيبتي جحا اولي بلحم توره .. وخليل اولي بام سحلول
ام سحلول : خليل كمان يا خراشي الحقيني يا ميرووو
خليل ياتي علي ذكر اسمه
خليل : ام سحلول ايه يا اما ال عايزة تجوزيهالي دي ..
ام متحت : شفتي اهو حتي خليل مش راضي .. مفيش غير متحت
خليل : متحت ده تركبيله لجام وتسوقيه .. قومي يا وليه من هنا يلا
ام متحت : الله انت بتطردني يا خليل ولا ايه
خليل : اه بطردك ويلا ما عندناش عفاريت للجواز
ام سحلول : لا راجل يا خليل .. طيب ما تفكر فيا تاني
تقوم ام متحت وتخرج من البيت
ام متحت : ماشي يا خليل .. بس خليكي فاكرة يا ام خليل ابنك طردني
ام خليلي : مع السلامه يا ام متحت خدي الباب في ايدك
خليل : قومي يا اما غوري العفريته دي من هنا
ام سحلول : غوريني يلا بقي .. انا عايزة اغور
ام خليل : ليه يا بني كده بس
خليل : قومي يا اما مش ناقصين هبل
وتقوم ام خليل وتاخذ ام سحلول تعيدها الي ميرو وهي تقول
ام خليل : سامحيني يا ام سحلول معرفتش افرفشك ياختي
ام سحلول في نفسها : فينك يا ميرو .. فينك يا احمد .. ااااه يا ضياء .. ال يخرج من داره يتقل مقداره
وتعود ام سحلول لميرووو سالمه
‏*‏* تنويه .. ام سحلول دي من عند ميروو لحظات تامل ..كانت مكتئبه وعرضت ام خليل تستضيفها عندها شويه
وصف الاحساس
تحياتي

هناك 17 تعليقًا:

mohamed يقول...

بصى بقى يا وصف من أولها كده انا قلت لميرو تبطل تخنق على ام سحلول بس هيه ما سمعتش كلامى مش عارف ايه اللى بتعمله فى ام سحلول ده ( نياهاهاهاها يا ميرو علشان تبطلى تشربى نسكافيه لوحدك ) -
احمد عايز ام سحلول وام سحلول عايزه احمد ايه دخلك يا ميرو فى الليله بقى ,
أما ضياء فدا كان بيشتغل ام سحلول حبه وبيسرح بيها
انما احمد ده شاب ونعم الشباب ( لا تقوليلى خليل ولا متحت ) ادب ايه واخلاق ايه وشارى البنيه ونفسنا نفرح فيه ( اقصد بيه )

هههههههههههههه
الله يسامحك يا ميرو زى ما جبتى اكتئاب لام سحلول وادى النتيجه مدونتك لحظات عفرته ( اقصد تأمل ) اتعفرتت وادى مدونة وصف كمان جاتلها الحاله , انا بقول اخرج من هنا بسرعه لحسن انا مش ناقص انا اصلا متعفرت جاهز وبحاول اكون كويس ( استرها يارب )

MEROOooOOoo يقول...


تحفة يا وصف
حلوة أوى
والله مش بطلت ضحك
بس أم سحلول مش متعودة تسكت كده
المفروض كانت عفرتت خليل ده
ازاى يطردها ؟
أكيد بتفكرله فى حاجة تعفرته بيها
وكمان لما نشوف أحمد هيقول ايه فى موضوع العرسان اللى فلسعوا بدرى دول ؟
أصله لسه يعينى مكتئب هو كمان وبيتحايل على أم سحلول تخرج من البرميل

والله ياأم خليل تشكرى انكى فكرت تخرجى أم سحلول من الاكتئاب
بس نعمل ايه بقى الله يسامح خليل وام متحت وأحمد وضياء وميرو والكل كليلة

أحمد أحمد صالح يقول...

في البداية-دي بجد لأني اللي جاي هزار!- سعيد جدا إني اتعرفت على مدونتك يا وصف،و الشكر طبعا لمروة إنها كانت السبب في ده..
..
في البداية-لتاني مرة- قال الشاعر:
نقل فؤادك حيث شئت من الهوى
ما الحب إلا للحبيب الأول
يعني متحت، خليل، الان ديون،مهند ،حسين فهمي..كل ده ولا يفرق معايا لأن مهما اتخانقنا وزعلنا انا وام سحلولتي برضة مرجوعنا لبعض..بالعند في العزال،اللي هما عارفين نفسهم كويس!
..
في البداية-لتالت مرة- عاوز أشكر صديقي محمد جمال على كلامه الجميل في حقي وهو ده الصديق الحقيقي،مش زي ناس كدة عاملة بتوفق بينا وهي بتخرب ما بيني وبين ام سحلولتي..وهما عارفين نفسهم كويس برضة!،وطبعا الوحيد إللي كان ممكن أتنازل له عن ام سحلول بطيب خاطر هو ضياء،لكن ضياء سلطان مملكة السناجل ومالوش في مواويل الجواز دي.
..
أولا أنا زعلان على اللي حصل مع ام سحلولتي،وما كانش يصح أبدا إللي عملتوه معاها ده بحجة انكم عاوزين تفرفشوها،لأن طريق فرفشتها الوحيد مروة عارفاه كويس،وهي إنها تخرجها من البرميل اللي هي حابساها فيه مدعية إني انا السبب لأني جبت لها إكتاب!
رغم ان هي اللي حابساها عشان تحرمنا من بعض !!..لكن عل كل حال إحنا بينا إتصالات برميلية مش ممكن أي حد يقدر يقطعها !
..
بجد بقى مبسوط إني اتعرفت على المدونة،وعلى ام خليل وأم متحت،وعلى خليل وسناء-ألا،في وسط الكلام كدة, سناء مرلشنة ولا سنجل ؟ يعني يمكن يكون في نصيب ولا حاجة!-وأنا قرأت كام موضوع قديم عندك و كلها مواضيع جميلة واسلوبك فيها جميل جدا..
سعدت جدا بوجودي هنا،كل التحية.

ظلالي البيضاء يقول...

ههههههه ..
ناس فايقة ورايقة ..
اللهم يسعدكم .. ويسعدنا معاكم ..
تحيتي لك ..

هبة فاروق يقول...

جميله اوى يا وصف
استمتعت بقراءه التدوينه خفيفه الظل وأستمتعت بأم سحلول نشكر صاحبه الفكره ميروووو :))

وصف الاحساس يقول...

ا / محمد
ما تظلمش ميروو هي برده تلاقي كان قصدها تحافظ علي ام سحلول ورغم ده كله ما سلمتش من احمد وضياء وفي الاخر كمان خليل ومتحت
وبعدين احمد ده لو بيحب ام سحلول بجد كانه يحافظ علي سمعتها وما يعلقهاش كده
البونيه يا حخبيبتي جالها اكئاب من احمد
يلا ربنا يهدي الجميع
متخفش المدونه مقري عليها محدش يقدر يخترقها لا ام سحلول ولا سحلول نفسه
نورتني جدا
تحياتي

وصف الاحساس يقول...

ميروو
اي خدمه بس كان نفسنا نعمل الواجب مع ام سحلول الله يسامحه بقي خليل
هي بس تلاقيها كانت مستغربه المكان ومعرفتش ترد ولا خافت تطلع بعد ال شافته من ام متحت
انتي بتقولي ايه ..احمد كمان مكتئب طيب ايه رايك نحطوه هو كمان في البرميل مع ام سحلول ونشوف مين هيخلص علي التاني الاول
نياهيااهياااه وكده نبقي خلصنا علي الاتنين
نورتيني يا قمر
تحياتي لام سحلول

وصف الاحساس يقول...

احمد
في البدايه لاول مرة نورت المدونه وشكرا لميرو وام سحلول ال جابوك هنا
في البدايه لتاني مرة بقي
انت بقي احمد ال مجنن ام سحلول .. البيت ال قلته ده مشكوك فيه عشان طلع بيت تاني بيقولك
انا قلبي مساكن شعبيه يعني بعون الله هننسي ام سحلول وتحب تاني وتاني وتاني
في البدايه لتالت مرة
ميروو عايزة تفرح لام سحلول بس بتخاف عليها زي كل البنات وبعدين انت برده لو كنت قدمت السبت كنت لقيت الحد والاتنين والجمعه انما كمان عايز تتنازل عنها لضياء اهو ده ال لا ممكن ابداااااا
بعدين ام سحلول قاعده في البرميل بمزاجها ومش راضيه تطلع اقولك قولها انت تطلع اهو تيجي منك احسن برده
وفي البدايه الاخيرة ربنا يهدي الجميع ويسترها معاكي يا ام زغلول يوووه قصدي سحلول
بدايه بعد اخيرة
شرفت المدونه واصحاب المدونه ونشكر ميرو وسحلول وام سحلول انهم عرفونا عليك وبالنسبة لسناء فكاني ما سمعتش حاجة مراعاه لمشاعر ام سحلول
نورتني جدا
تحياتي

وصف الاحساس يقول...

ظلالي البيضاء
الله يسعد مساك يا ابو كرم
تحياتي لكرم والعائلة وسحلول وام سحلول

وصف الاحساس يقول...

هبه فاروق
انتي الاجمل يا قمر
سعيدة انها عجبتك ونشكر ميروو وام سحلول كمان
تحياتي

ريـــمـــاس يقول...

صباح الغاردينيا وصف
ههههههههههههههه
اي ده هي ام سحلول هنا كمان
هو احمد سايبها تهيص هنا وهناك ولا ايه هههههههه
بجد ياوصف جميلة والشكر موصول لميرو كمان متابعاكوا اما نشوف اخرت ام سحلول :)"
؛؛
؛
لروحك عبق الغاردينيا
كانت هنا
reemaas

Deyaa Ezzat يقول...

عايز اقولك إني مبسوط جدا إني اتعرفت على مدونتك.. عن طريق ام سحلول اللي مشحططانا وراها وجرستنا في بلوجر

وعايز أشكر صديقي محمد اللي دايما فاهمني صح $: .. مش عارف أقولك إيه والله يا محمد.. روح يا شيخ إلهي زعبوبة تحبك

كان نفسي أشوف ام سحلول مبسوطة ومزجططة وقلت ده هيحصل لما تغير العتبة.. لكن من الواضح إنك كنتي عايزة أم سحلول في مطالب فئوية.. يا إما عايزة تخلصي من متحت يا إما عايزة خليل يوحشك
وعقدتيلنا البنية زيادة.. وبقى من الواضح إنها عقدة بشنيطة على رأي عزيزة

يا يعني عليك يا أحمد يا صاحبي يا حبيبي يا أخويا.. ربنا معاك.. هتلاقيه من مروة وللا وصف وللا محمد جمال
هههههههههههههه

وصف .. فعلا أسلوبك جميل وضحكت أوي على ام سحلول (شششش طبعا ده بيني وبينك)

هكون حريص على متابعة مدونتك إن شاء الله

momken يقول...

هههههههههههه

جميله جداً

لديك موهبه حقيقيه فى كتابه السيناريو
وطبعا خفه ظل تشع من ثنايا الكلمات

دمتى مبدعه

تحياتى

وصف الاحساس يقول...

ريماس
انتي الاجمل يا قمر
ام سحلول دي دوختنا من هنا لهناك وياريت عاجب
الا برده لسه مكتئبة
نورتيني جدا
تحياتي

وصف الاحساس يقول...

ضيااااااااااااااااااء
اخيرا عرفت من هو ضياء
اولا نورت المدونه لانها اول زيارة
ثانيا بنشكر ام سحلول ال عرفتنا عليكم كلكم والله
ثالثا بقي انا لو منك انت واحمد اطبق المثل بتاع التار ولا العار ام سحلول ده مش بس جرستنا دي فضحتنا جدام الخلج خلت رجبتنا جد السمسمه
بجد بجد نورتني جداا جدا
تحياتي

وصف الاحساس يقول...

ممكن
ايه النور ده
نورت المدونه
بشكرك علي كلماتك الجميله البركة طبعا في ام سحلول ال خلتني اتعفرت زيها واعمل ده كله
نورتني جدا
تحياتي

entrümpelung wien يقول...

شكرا لكم .. دائما موفقيين ..))

entrümpelung
entrümpelung wien