الثلاثاء، 3 يناير، 2012

كوافير ام خليل ...!!

ام خليل فجاه كده وبدون مقدمات نادت علي الواد خليل ابنها وقالتلو
ام خليل : واد ياخليل
خليل : نعمين يا حجه
ام خليل : امبارح يا ولا كنت بتصور
خليل : ليه يا حجه
ام خليل : مش ده الموضوع يا عين امك
خليل : امال يا غاليه
ام خليل : ايه رايك يا ولا نفتحو استوديو تصوير اهو انت طول النهار قاعد علي المخروب ده تظبط في صور اهو تعمل حاجه تنفعك
خليل : والله فكره يا اما بس ده هيتكلف ياما اوي كمان مش هينفع الا اما يكون جنبه كوافير عشان العرايس
ام خليل : لا يا خويا الكوافير لا كده هندخل في حرمانيه واننا بنشجع الناس علي البدع
خليل : ماهو ياما الاستوديو ده مش هينفع الا بكوافير فاكره الواد حنفي ابن خالتي جملات
ام خليل : ماله
خليل : كان فاتح استوديو من غير كوافير وشهر ورا التاني مفيش زباين اه وربنا لحد ما قفلو واتداين وباع العده
ام خليل : طي وبعدين اصل انا اخاف اعمل لواحده حاجه وتبقي حرام علينا وربنا ما يباركلناش في رزقنا
خليل : خلاص يا اما احنا اي واحده تيجي نفطمها انها كده بتعصي ربنا وان ال هتعمله لو لفتنه يبقي حرام
ام خليل : يا خراشي ما احنا كده محدش هيعتب عندنا
خليل : ماهو احنا نجيب للكوافير ده حاجات كده تمشي الحال وخلاص انما الاستوديو نعملو كويس
ام خليل : والله عندك حق يا واد يا خليل .. واهو ناخدو علبه المكياج ال انت جبتها هديه للموكوسه مرات اخوك ولا فتحتها والمكواه الصيني ال اختك اشترتها من الراجل ال بيلف دي طلعت ايه تحفه وفستان فرح مراتك ومرات اخوك وفساتين الشبكه
خليل : اه ياما ولو لزم نجيب كام فستان من دسوق دول رخاص اوي واهي كمان نعمل تاجير فساتين والله وهتلعب معانا يا اما
ام خليل : طب مين هيشتغل في الكوافير ده
خليل : البت نوسه بتك بدل ما هي قاعده واكله شاربه نايمه ببلاش كده نوديها تتعلم مع خالتي ام مدحت في الكوافير بتاعها علي ما نجهز
ام خليل : بس البت نوسه دي لخمه ومش هتتعلم بسرعه
خليل : ما هو ايدك بقي معاها ياما وهوصي عليها البت حسنات ال عند ام متحت تفطمها وتنحررها
ام خليل : ايوه الله يسترك خليها تتفك عقدتها يمكن ربنا يعترها في واحد ابن حلال ويفكنا منها
خليل : بس قوليلي يااما هنلاقي دكانين فين نفتحهم علي بعض
ام خليل : ودكانين ليه اوضتك انت واخوك علي الشارع نفتحهم علي بره ونقفلهم من الشقه ولا نعملهم باب واحد واهو يبقي زيتنا في دقيقنا
خليل : من غير ولا رخص ولا حاجه
ام خليل : ياواد ده احنا اتحررنا خلاص رخص ايه الكلام ده كان زمان يقدر حد يعتب هنا دلوقت ده اهل الحته يقطعوه مش شايف ابو حسن وابو علي وعمك ال ما يتسمي بانيين كام دور
خليل : طب انتي يا حجه بقي معاكي كام
ام خليل : معايا ربنا هو للقرشين ال انا شايلاهم لجواز اختك دول اقدر اقرب منهم ابدا دي امانه
خليل : امال هنجيب فلوس منين يا غاليه
ام خليل : بيع سيغه المحروسه مراتك هي دي وش دهب ولا عمرها لبسته
خليل : هو انتي ما دريتيش
ام خليل : لالالالا
خليل : مش انا دخلت بيه مصلحه وخسرت
ام خليل : انت هتشتغلني مصلحه ايه يا عنيا ما انت واكل شارب نايم انت والمحروسه ببلاش ولا عشان جيت عند الدفع هتسد ودانك
خليل : بقولك ايه يا اما فكك من المشروع النحس ده ال هيخلينا نخسر بعض
ام خليل : قوم يا واد ن هنا انا ال غلطانه اني بفكر فيك انت و.....
خد يا واد انت رايح فين مش بكلمك ..
انت يا ولا
عيال اخر زمن
...
...
وهكذا اغلق كوافير ام خليل قبل ان يفتح
وصف الاحساس
تحياتي

هناك 14 تعليقًا:

P A S H A يقول...

هههههههههههههههههه

هي أم متحت السبب طول عمرها وليه نحس
:)

تحياتي لأسلوبك الرائع

أمة الرحمن يقول...

زعلتشينى يا وصف على ام خليل كده مشروعها باظ

اممممم جميله هههههههههه

تسلم ايدك

أمل م.أ يقول...

هههههههههه
وربنا ام خليل وابنها خليل تحفة
بس احلى شي الموكوسة مرات خليل
يا لهوي على الحموات
بس بجد ازعلت
كان نفسي المشروع ينجح
يلا خيرها في غيرها

وصف الاحساس
احسنتي الوصف بطريقة جميلة
عفوية محببة لنفس القارئ
احييك على هذا الاسلوب الجميل
تقبلي مروري

كوني بخير دوما يا رب

وصف الاحساس يقول...

Pasha

والله ام متحت دي غلبانه بس الناس هي ال ظالمينها

نورت يا باشا
تحياتي

وصف الاحساس يقول...

امه الرحمن

والله انا كمان زعلت
اصل انتي مش عارفه المشروع ده بالنسبه لام خليل كان ايه
هههههه
نورتي يا قمر
تحياتي

وصف الاحساس يقول...

امل .م.ا

اصل انتي ما تعرفيش ام خليل وخليل ده البلد كلها تعرف قد ايه هي ست جدعه وبنت بلد
المهم المشروع ده كان مهم اويلوﻻ بس الواد خليل ال مدكن علي القرشين
شرفتيني يا قمر
سعيده ان الموضوع عجبك
تحياتي

نسرين شرباتي "أم سما" يقول...

ههههههههههههههههههههه
واحشني الواد خليل ع فكرة
واحشني كتير أوي
والبوست جنان ع فكرة
جميل أوي يا وصف ياللي مش عارفة أتلم عليكي واكلمك زي الناس :)

وصف الاحساس يقول...

نسرين

صدقي انتي بت حﻻل لسه خالتك ام خليل بتسال عنك وبتسلم عليكي
وخليل كمان ههههههههههه وابو خليل بالمره
ابقي ابعتيلي لو شفتيني اون عشان مش بعرف اشوفك

هبة فاروق يقول...

حلو خليل وام خليل
دمك شربات يا قمر ..بوست تحفه
بس فى ملحوظه صغيره ابقى كبرى الخط معلش العتب على النظر بقى بجد اخذت مجهود فى القرايه
شكرا

ظلالي البيضاء يقول...

يا عيني على خليل وأم خليل ..
أسلوبك مصريييييي قح .. يعني مصرية أصلي 100% هههههه
قصة جميلة ..
تحيتي لك أم محمود ودعواتي لك بالخير ..

Tamer Nabil Moussa يقول...

ام خليل دى وابنها عسل والله ههههه

تسلم ايدك وصف

مع خالص تحياتى

وصف الاحساس يقول...

هبه فاروق
خليل وام خليل بيسلمو عليكي
انتي ال عسل
الخط بقي والله غصب عني ﻻني بكتب من الموبايل مش بيتحكم في الخط
معلش اني تعبتك معايا غصب عني بجد

وصف الاحساس يقول...

ظلالي البيضاء

خليل وام خليل بيسلمو عليك
ههههههههههه
نورتني يا ابو غني
تحياتي

وصف الاحساس يقول...

تامر نبيل
ازيك يا تامر عامل ايه
سعيده انها عجبتك
نورتني جدا
تحياتي