السبت، 13 فبراير، 2010

حاولت تعمل حاجة ..؟؟

والله حاولت ..بجد كتير حاولت يمكن كتير نجحت
وكتير برده فشلت .. بس علي الاقل حاول
حاولت لا انكد عليا ولا علي ال حواليا ولا عليكو
بس والله غصب عني ما قدرت
معرفش ليه دايا في حاجه ناقصة
او دايما الكوبايه فيها كتير ناقص حتي لو مليانه
دايما في مسمار جحا
دايما في لو .. بس ...
معرفش يمكن ساعات بيبقي جوا الواحد واحد تاني
انا يقول يمين هو يقول شمال
دايما مش عاجبه حالك .. ساعات تبقي مرتب حالك
كلامك وموقفك واول ما تيجي تتكلم تلاقيه هو ال بيتكلم
تلاقي كلامك غريب ومش زي ما انت عايز
بتحاول تنسي وما تتاثرش بس مفيش فايدة
يمكن دي النفس الامارة بالسوء
عارف اما تحب ناس وتكون كويس معاهم
ويتهيالك انهم معاك كويسين برده
وفجاة تلاقي كلامهم عنك واحساسهم بيك مش زي ما هو باين
اما تشوف بنفسك نفسك وانت سيرتك من قدامك غير من وراك
ممكن في لحظة تحس بكل ال انت عايش فيه وهو ولا سراب
حياتك واقفة علي منحدر حاسس لو خطيت خطوة هتقع
كمان ما ينفعش ترجع ومفيش اتجاه تاني
واقفه ليه دايما الحياه
ليه دايما الطريق ناقص او مسدود
ليه دايما النهاية بتيجي بدري عن وقتها
او يمكن ما دريناش ان كل حاجة بقت بتخلص بدري
او ماكناش واخدين بالنا مطمنين ومش مديين خوانه لحد
يمكن بقي عيب فينا اننا طيبين ومش مكدبين حد
حاولت اداري احساسي قمت اغسل وشي لقيت الميه قاطعة
كل الظروف مش مساعدة
بس حقيقي مصدومة وما كنتش عارفة انطق ولا عارفة ايه ال انا فيه
بس والله حاولت انسي كلمت اغلي الناس عشان اخرج من حالتي بردة لقيتها مسيطرة عليا
الظاهر بقي الاكتئاب في دمنا ولا يمكن الجو بقي ملبد بالغيوم
ولا الشمس خلاص ما عدتش بتدوب الهموم
ولا الناس بقت ايه مش عارفة
طب الواحد يعمل ايه بعد كدة اماتحس انك مصدوم في حد كان غالي عليك
بس علي كل حال لازم نحاول نعمل حاجة مهما كان
خير لك ان تحاول من الا تفعل شيئا علي الاطلاق
وصف الاحساس
تحياتي

هناك 6 تعليقات:

هي وظروفها يقول...

وجهه نظري انه مش عيب الورده ان حد ما يشوفش لونها وجمالها ويشكي من شوكها

الخلل عنده هو مش عندي انا

هو اللي عنيه وودانه مبتحبش تشوف ولا تسمه ولا لسانه يوقول ولا ينطق غير بالسواد اللي جواه تجاه اي حد

يجوز هوايه ويجوز قله ثقه في نفسه واسقاطه بيجيبها في اي حد

بس مش معني كده ان الواحد يقف ولا يتضايق
لا انا اقف وانور الانتظار واخد نفسي
واشوف انا ايه وثقتي في نفسي وفي حياتي ايه
واكمل وطز في اي حد يقهمني او يكلم عليا بطريقه زباله
لانه هو اللي عايش في من جواه في زباله ويقول اللي يقوله يشوف مين هيسمعله
ولو حتي حد صدق اللي بيتقال عليه ساعتها يبقي ميلزمنيش
اللي ليه عندنا بلحه ياخدها عزبه نخل
طولت بس بجد اللي يقيم نفسه من خلال ناس مش ناس يبقي بيدمر نفسه وارجو تكوني انضج منهم وسيبك من اللي يكلم عليكي خااااااااااااااااااااااالص

wasf_elahsas يقول...

هي وظروفها
بجد كلامك ريحني بس انت عارف المشكلة ان الناس دي الواحد بيتعامل معاها كل يوم مش عارفة تاني ابص في وشهم ازاي
اضحك معاهم ازاي اتعامل معاهم ازاي
ما ينفعش ابعد لانه مش بايدي
عارف احساس اما تكون عايم في بحر
مضطر طول الوقت تعوم لاي اتجاه وتحاول تفضل طول الوقت محتفظ بنفسك
رغم الموج العالي ورغم الالم والتعب والاجهاد
مش عارفة اقولها ازاي
يمكن الواحد بقي بيسلم امره لربنا وهو خايف من الدنيا وال فيها وكل خرابه بقي فيها عفريت
بس لازم نعيش ونحاول نعيش حتي لو غصب عنا وعنهم
بس غصب عنك بتتعب ده احساس طبيعي اما تبقي طول الوقت في صراع خايف من اي كلمه ممكن تقولها تتنقل لحد بصورة تانيه وكمان يبقي في كلام عليك مع انك ما عملتش لحد حاجة وحشة
اه انا معاك ال له عندنا بلحة ياخدها عزبه نخل
واياكش تولع بس الواحد واصل اصلا تعبان ومش مستحمل او مش ناقص حد كمان كفايه ال هو فيه
يلا بقي هي عيشة ولا اكتر
الحمد لله علي كل شيء
نورت الموضوع
تحياتي

سمع هوص (Abo 3li) يقول...

مرحبا بكي في نادي المحبطيين والمكتأبين...
نصيحة ديما بقولها وبعمل بيها..
لازم الواحد يغلس علي الدنيا..
يغلس علي الهم والنكد... يمكن يطفش ويسبنا...
لو كان النكد غتييت ولازقلنا.... لازم نحاربه بسلاحه..
نبقي اغتت منه... ونبتسم في وشه ابتسامة بلهاء.... ونقوله عادي يعني.. ماياما شوفنا نكد اجمد منك بكتييييييييييير...


يلا محدش بيكولها بالساهل

تحياتي

العيسوى الصغير يقول...

اللى من وراك سيبك منه بس من غير اسرار لانه مش هيقدر يعماك حاجة فى وشك
و اظن ان دى عادة البنات مش جديدة
و اظن المياه جت يلا اغسلى وشك

wasf_elahsas يقول...

سمع هس
انا مش انضميت للمكتئئبين والمحبطين
انا اصلا من مؤسسي هذه الرابطة
والله فعلا ما حدا بياكلها بالساهل كدة
بس شو بنعمل لها الدنيا
ما بتسيبنا لحالنا
دايما في شيء بينغص حياتنا
اه يا عيوني بيكفي عذاب
لا ده من اثر السخونية قلبت خليجي
هههههههههههههههههه
تحياتي

wasf_elahsas يقول...

العيسوي الصغير
ال بيقول الكلام ده عليا لو هو ما بيني وبينه شيء ما كنت احط اي كلمه براسي
بس ال بيغيظني صح انه انا بتعامل معه كل يوم وطول يوم في وش بعض
صعب قوي العيشة كدة كل واحد شايل للتاني ورا ضهره شيء متحسب لاي حاجة تحصل
يلا بقي تيجي زي ما تيجي
نورت المدونة
تحياتي