الجمعة، 12 فبراير 2010

Double Face

امبارح كنت بسمع فيلم اجنبي الصبح عن قاتل النساء
" دايما الستات غلابه عمرنا ما سمعنا عن سفاح الرجاله "
ال بيظهر بعد سنين من اعتزاله لنشاطه
عشان يرجع يمارس هوايته المفضله
طبعا المخابرات والشرطة هاجت وماجت واجتهدت في البحث عن السفاح
القصد من الحكاية ايه
ان الاخ السفاح ده عادي كده له بيت وعيله
وبيقعد مع مراته يتابع بكل برائة المؤتمرات والاخبار ال بتتكلم عنه
وتخاف مراته وتبكي وتقول
انها صلت كتير من اجل هذه المدينه ان السفاح يكون مات
عادي برده هو يقوم ياخدها في حضنه الحنين و يطمنها ان هو معاها
وطبعا من فوق راسها يبص ببصه مليانه انتصار
ليه بقي
لانه حقق المعادله الصعبة الزوج الحنين بالنهار
والسفاح المحترف بالليل
نظريه الدوبل فيس  او ازدواجيه الشخصيه
زي ما مثلا ما يقولك لازم تفصل بين شغلك وحياتك الشخصيه
ودايما بنحاول ودايما بنفشل
فلازم قبل ما تدخل البيت تحط مشاعرك في جزمتك وتسيبها بره البيت مع الناس ال جوا
وبرده في الشغل اول ما تطلع من البيت تلبس لبس الشغل وتتوكل تنكد علي الناس ال هناك
او مثلا يعني زي اخونا السفاح ما بيعمل
طايح يقتل في الحريم بالليل ويرجع لمراته بكيس جوافه يفرحها برجوعه سالم غانم
يعني ممكن تبقي حرامي عادي او نصاب محترف او مختلس لا سمح الله
وترجع البيت الضحكة من الودن دي للودن دي
وتقعد تتكلم مع العيال عن الشرف ال احسن من مفيش
والحلال والحرام ...عادي تيك ات ايزي ...
دي نقرة ودي نقرة برده
هو يعني السفاح احسن منك في ايه مش مهم انت ايه المهم ابنك يبقي احسن منك ودايما انت في نظره المثل الاعلي
زمان كانت الالوان يا ابيض يا اسود
ودلوقت بقت الدنيا علي كل الالوان
مناظر واشكال ال جوا لون وال بره لون
محدش بقي عارف ايه ال مستخبي ورا الالوان
بقت حياتنا كلها بطيخ في بطيخ
محدش بقي عارف ال جواه ايه .. اقرع ولا اقرع
بقينا نمد الخطاوي فوق الشوك والخوف
محدش بقي يامن حتي لاخوه
بقت كل حياتنا كدب في كدة
مبررات واعذار ... وخوف مالوش نهايه
نفسنا نشم هوا نضيف من غير خوف ولا قلق
من غير حزر ولا تحريص
من غير ما نخاف ولا نبقي بوشين
من غير ما نلبس دوبل فيس
بس ايه الحل اي دونت نو
وصف الاحساس
تحياتي

هناك 11 تعليقًا:

سمع هوص (Abo 3li) يقول...

يااااه... تصدقي شغلانة حلوة.... اشتغل سفاح حريم... ودي اعملها انترفيو فين دي؟؟؟


خمسة جد.. عندك حق في كل كلمة... تلاقي الراجل من دول عامل فيها متدين ومربي دقنه.. وفي شغله فاتح الدرج للداخل والخارج..

ونمازج كتيرة..

بوست جميل .. تحياتي

سمع هوص (Abo 3li) يقول...

اول تعليق......
هعهعهعهعهعهعهعهعهعه


عايز جايزة

وصف الاحساس يقول...

هع هع هع هع هع
فرحان يعني انه اول تعليق
انا فرحانه اني بقيت بلاقي حد بيعلق اصلا
هع هع هع هع هع
منور البوست واصحاب البوست يا باشا
وفعلا النماذج دي بقت كتير اوي
ومش تحتاج تعمل انتر فيو عشان تبقي سفاح
هي مطواه علي كام خنجر وكاميرا تصوير وحبل ودمتم
وهتعمل احلي شغل
بس اللهم احفظنا منك بقي
نورت المدونه
تحياتي

هي وظروفها يقول...

يااااااااه

طلبك بسيط خالص عايزه تعيشي ونعيش في امان وحب وحياه حلوه وهوا نضيف
سهله ادعي ربنا انك تدخلي الجنه

بصراحه ومش عارف ليه الدنيا هبا عليا برياح اكتئاب من مده
بس الدوبل فيس دلوقتي هو الأصل والكويس الواضح الصريح الدوغري
هو الشاذ ولو لقيتيه يبقي يا بختك
بس اكيد في حل
والله ساعات ببقي مستمتع جدا بالناس ساعات كتير اتبسط لما يكون معايا ناس محترمه وبنت حلال بس الغالب انه لوالواحدسها شويه تلاقي الزباله من البشر طلعت وملت وانتشرت في المكان كله
يارب تتحقق امنيتك وامنيتي ونشم هوا نضيف من غير عوادم التناقض وقله الضمير والحب والذوق

مجرد حلم صغنتوت يقول...

بقى صعب اوي في الزمن ده ان الواحد يبقى ليه وش واحد
مش من الناحية السيئة والله
بس مثلا ساعات كتير الواحد بيبقى متضايق ومش عايز اقرب الناس ليه تعرف انه كده علشان مش يتضايقو هم كمان.. يقوم يعمل ايه بقى؟ يبقى قدامهم زي الفل ومزاجه اشته واول ما يقعد مع نفسه يطلع كل اللي نفسه فيه
ما هو كده يعتبر بوشين برده.. بس مش حاجة وحشة خالص
وطبعا الجانب الاخر انه يبقى وشين واحد فيه طيب والتاني شرير دي برده بتحصل
والمشكلة اننا ساعات مش بنعرف ده

تسلم ايدك على البوست

صيدلانيه طالعه نازله يقول...

تفتكرى ان السفاح بس اللى عنده دبل فيس
كلنا كده و الله يا وصف
انا ساعات ابص فى المرايه و استغرب
و اقول انا ليه بعمل كده طبعا باكون عامله حاجه مضايقانى و مكرهانى فى نفسى

الدبل فيس دى حاجه عاديه فينا كلنا بس المهم ميبقاش فيس منهم مؤذى

وصف الاحساس يقول...

هي وظروفها
اولا نورت المدونة
ثانيا هو الاكتئاب في الوقت ال احنا فيه بقي حاله عامة
مش انت لوحدك
ثالثا بقي بالنسبة للموضوع
هو اصلا الواحد مش ضامن جنه وبعدين احنا فين والوقت ده فين
مش عارفة اقولك ايه والله تعبت من طول الوقت بتعامل ناس قدامك بوش ومن وراك بوش
بقت صعبه الحياه قوي
هييييه دنيا
ما دايم الا وجه الله
تحياتي

وصف الاحساس يقول...

مجرد حلم صغنتوت
اولا شرفتني جدا لان دي اول زيارة
ثانيا
الحاله ال قلتها دي وشين بس مش الحالة ال تخاف منها
بالعكس الحاله دي ممكن بتيجي علي نفسها عشان ما تتعبش ناس جنبها
انما فعلا ال تخاف منه ال بيضحك في وشك ومن وراك ماسك سكين
ال عامل فيها شيخ وهو اصلا تايواني
حاجات كتير تحس انه صعب تاخد الفكرة الكويسه عن حد لانه مابقاش في حد ال جواه زي ال براه
يلا اهي ماشيه وماشيه الناس
نورت البوست واصحاب البوست
تحياتي

وصف الاحساس يقول...

صيدلانيه طالعة نازلة
منورة المدونة واصحابها
كلنا ممكن نغلط وبنغلط وممكن نرجع نصحح الغلط ونندم عليه
ده مش وشين انك تعترفي انك عملتي حاجة وضايقتك
انما اما تبقي بتعملي حاجة ومستمرة فيها وقدام الناس متضايقة وبينك وبين نفسك عادي يبقي ساعتها انتي بوشين
عارفة يمكن هما حالتهم اصعب من ال بيبصولهم لانهم مش حاسين ان الناس شايفه وعارفه كل حاجة هما بس ال مش واخدين بالهم وللاسف ده مش بياثر عليهم لوحدهم بالعكس ولادهم واهلهم بيتاثرو بسمعتهم وكلام الناس عليهم
بتبقي لعنه حلت علي كل المقربين منهم ومش سهل انهم يتخلصو منها
نورتي يا قمر
تحياتي

Unknown يقول...

حلوة حته الجزمة دى بس عاوز مقاس كام بقا

وصف الاحساس يقول...

العيسوي الصغير
والله انت ومشاعرك بقي
تقدر تلاقي جزمة علي قدها
ههههههههه
منور دايما
تحياتي