الثلاثاء، 17 أبريل، 2012

اعدادي هندسه 2

احمد : من الصبح محاضرات .. دماغي هتنفجر .. ماليش دعوه انا عايز هشام يا ننجح سوا يا نفشل سوا .. عايز احول تجاره
ياتي ابو احمد علي صوته ويجلس علي كرسي اخر بالصاله
ابو احمد : يعني ما صدقنا واحد يفلح عايزهم اتنين يفشلو .. حرام عليكو هتموتوني بقهرتي
تاتي ام احمد من المطبخ بسرعه
ام احمد : ابو احمد . .. سلامتك يا خويا لا هما هيعقلو .. ده اكيد بيهزر
يجلس هشام بجوار احمد
هشام : لا يا احمد لازم انت تنجح عشان اما ابقي عاطل الاقي حد استلف منه
يضع احمد يده علي راسه
احمد : ايه الافلام دي كلها يخرب بيت كده ايه يا ابو احمد وام احمد واخويا كمان
يضحك الجميع ثم يقول ابو احمد
ابو احمد : يا حبيبي احنا فرحانين كلنا بيك حتي اخوك فرحانلك هتضيع فرحتنا .. ده احنا كان نفسنا اخوك يبقي معاك بس نعملو ايه النصيب .
هشام : ايوه يا احمد والله انت مش عارف انا مبسوط بيىك ازاي لازم تكمل يا احمد واحنا هنفضل طول عمرنا اخوات هتفضل حبيبي واغلي من حبيبي واما تحتاجني هتلاقيني انشاله حتي اسيب الكليه واجي اقعد معاك
احمد : ربنا يخليك يا هشام انت مش عارف انت واحشني ازاي اصل انا مش متعود علي فراقك... ده انت يابني طلعت حاجه جامده اوي و وانا ماكنتش حاسس
هشام : وانت والله يا احمد انت فاكر اني مبسوط من غيرك انا بس عشان مكنش عندي حاجه واتعرفت علي زمايل كتير بس زيك مش هلاقي
ام احمد : ربنا يخليكو لبعض يا حبايبي وما يحرمكو من بعض ابدا
ابو احمد : مش قلتلك نجيبلهم حته عيل يفكهم من بعض عاجبك كده
احمد وهشام ينظران لبعض ويضحك الجميع وينصرف كل منهم الي حجرته
..
..
اليوم التالي

احمد في الكليه
احمد : السكشن بدء
عمر : لا الاسبوع ده مفيش سكاشن
احمد : يعني اجازه
عمر : اه
احمد : يا خساره ده انا صاحي بدري
عمر : هتروح علي البيت ولا ايه
احمد : مش عارف هشوف كده .. يلا سلام
عمر : ما تخليك معانا نشوف زمايلنا
احمد : لا انا عندي مشوار خليها يوم تاني
عمر : خلاص اوك
يمشي احمد ويخرج موبايله يتصل بهشام
هشام : ايوه يا مودي
احمد : مودي في عينك ..
هشام : طيب يا حمودي عامل ايه
احمد : انا فاضي مفيش سكاشن وفاضي انت بتعمل ايه
هشام : فاضي يا معلم
احمد : خلاص هجيلك
هشام : لا انا هخلع من العيال ال معايا ونتقابل بره احسن .. احمد اوعي تقول لحد ان ليك اخ توام شبهك
احمد : ليه انت في مكان وانا في مكان
هشام : بص اما اشوفك هفهمك
احمد : اوك خلاص نتقابل علي البحر
هشام : اوك
...
...
بعد نصف ساعه يلتقي احمد وهشام في كافيتريا علي البحر
احمد : اتش واحشني يا غالي
هشام ياخده بالحضن
هشام : وانت كمان يا مودي
احمد : مش كبرت علي مودي دي ولا ايه
هشام : ماشي يا هندزه
احمد : ماشي يا اسطي
هشام : بص يا احمد لازم نتعود اننا بنفترق عشان ما نتعبش
احمد : مش عارف يا هشام اعيش من غيرك والله الحياه من غيرك وحشه
هشام : انت فاكر اني مرتاح يعني .. بس لازم نقدر
احمد :طيب انت ليه قلتلي ما قلش اني ليا اخ توام
هشام : يمكن نحتاج نبدل
احمد : نعم .. ازاي بقي
هشام : يعني يوم اسلملك شيت وانا رايح تحضر مكاني سكشن اي حاجه
احمد : فكره برده خلاص خليها سر
..
..
الاسبوع التالي
عمر : بقولك يا احمد ..
احمد : ها
عمر : احنا هنحضر في المجموعه التانيه المحاضره بتاعت الميكانيكا لان الدكتور كويس عن الدكتور ده وكمان معادها كويس
احمد : هي امتي
عمر : الفتره ال جايه
احمد : خلاص احجزلي معاك مكان وانا هجيب شاي واجي
عمر : طيب جيبلي معاك معلقتين سكر بس
احمد : اوك
يدخل عمر المدرج بينما احمد يتجه للكافيتريا ويحضر الشاي ويدخل المدرج
عمر : ايه ده انت جبت منين
احمد : من الكافيتريا
عمر : كافيتريه ايه الله يخيبك .. انت يا احمد ما تتسابش لوحدك
احمد : في ايه يا بني بس
عمر : الشاي بتاع الكافيتريا ده ما يتشربش وغالي
عم حسين فراش المدرج بيعمل شاي عجب ده تجيب منه .. بص انا هخدك اسبوع افهمك الكليه ماشيه ازاي وبعدين اسيبك تعيش بقي .. انما كده اشيل ذنبك
احمد : ايه يا عمر هو انا لسه نونو
عمر : لا يا حبيبي بس انت في كليه وعشان ما تبقاش نونو وتضحك عليك الناس هفهمك الدنيا هنا ماشيه ازاي
احمد : طيب انت تعرف ده كله ازاي
عمر: اخويا يا سيدي قبل ما اجي الكليه اخدني من ايدي ولف بيا الكليه كلها وقعد يفهمني علي كل ده
احمد : طيب خليني معاك
عمر : الدكتور جه اقعد وحط الكوبايه تحت
احمد : حاضر
وبدء الدكتور المحاضره واحمد منتبه له تمام الانتباه الي انت انتهت المحاضره واخذ احمد اشياءه وهم في الانصراف مع عمر ولكنه التفت وراي شيء لخبط كيانه
وصف الاحساس
تحياتي

هناك 20 تعليقًا:

Tamer Nabil Moussa يقول...

حلوة القصة دة سناريو فيلم يا وصف بجد جميل ومتابع معاكى

مع خالص تحياتى

;كارولين فاروق يقول...

جميله القصه قرأتها دون ملل
وانتظر الجزء الاخر حتي استمتع
اكثر مع قصتك
تحياتي

ميمي يقول...

جميلة القصة اوي قرأتها باستمتاع ومتابعة معاكي الى النهاية ان شاء الله
باقات ود وحب
ميمي ^_^

P A S H A يقول...

ينفع كده تعلقينا ؟؟؟؟؟

طب أنا ممكن أقترح على حضرتك إقتراح حلو .. شوفي فاضل كام حلقة واللي عاوز يقراهم مرة واحدة يدفع :))
وأهو قرش من هنا على قرش من هنا يساعدوا في مصاريف كليات الأولاد :))

القصة هايلة والله والأحداث مشوقة والسرد جميل
ما تتأخريش بقى يا أستاذة في الحلقة الجاية إن شاء الله ، الموضوع بدأ يحلو أهه

خالص تحياتي

رؤى عليوة يقول...

اممممم ياترى ايه بقى اللى شافه

مستنيين نعرف

وحلو طلعو من اسكندرية :)


التواءم حالات فعلا غريبه بس الاغرب انك تلاقى منهم اللى يعترف لبعض كده بالكلام غالبا بيكونوا عايزين كل واحد يبنى شخصيته لوحده



دمت بخير

د.ريان يقول...

انا مسكت معايا الا اعرف ايه الشيء الي شافه احمد ؟ يكنش المفعوصة مي عز الدين
اصلها طلعت كم مرة في فلم جامعة ههههههه

مساء النور قبل ماانسى ياوصف الاحساس

بس بجد الجزء دا روعة شدني بجد لحد مابردت قهوتي وكنت بافكر ايه خطط هشام لموضوع تبادل المحاضرات

وايه اسرار الجامعة الي بيقول عليها عمر ويادوبك بفكر اتشديت

مع الي شغل احمد وفجأة أنتهى الجزء ..

منتظرين ان شاء الله الجزء القادم :)

ويسلم فكرك ِ ياوصف الراقية

دمتم بخير

ليلى يقول...

قصة رائعة ومشوقة واسلوب مرح ومميز
بوركتم

وصف الاحساس يقول...

تامر نبيل
طبعا هو حلم كبير انها تبقي فيلم او ما شابه ذلك بس ربنا كبير
نورتني جدا
تحياتي

وصف الاحساس يقول...

كارولين فاروق
من عيوني يا جميل
سعيده انها امتعتك وعجبتك
منوراني دايما
تحياتي

وصف الاحساس يقول...

ميمي
جميله باقه الورد في الربيع ده
مرسي يا قمر
نورتيني جدا
تحياتي

وصف الاحساس يقول...

باشا
اممممممممم .. انت كده هتخليني افكر جديا من استغلالها مثلا اقفل قرائتها للي يدفع .. او مثلا احط تليفوني وال عايز يقرا يشحنلي .. ههههههههههههه
بس تفتكر حد هيدفع
نورتني جدا
تحياتي

وصف الاحساس يقول...

رؤي
ده ال هتعرفيه في الجزء ال جاي
التوائم فعلا مرتبطين ببعض جايز مش بنفس الصوره بس هو حسب الظروف ال اتربو عليها
نورتيني يا قمر
تحياتي

وصف الاحساس يقول...

د ريان
البت المفعوصه دي اقتحمت فعلا افلام الجامعه كلها بس المره دي لالالالا هنكتشف اوجه جديده هههههههههه
سعيده جدا جدا بكلامك الجميل والله فضل مفرحني يومين وشويه
فعلا بجد شكرا جدا ليك
نورتني جدااااا
تحياتي

وصف الاحساس يقول...

ليلي
اول مره تشرفيني يا قمر
نورتيني جدا جدا و سعيده ان القصه عجبتك
تحياتي

هبة فاروق يقول...

حلو الحوار يا وصفتى الرائعه
عارفه اسلوبك مشوق وجذاب وسلس استمرى فى كتابه القصص لانى من عشاق كتابه القصص وقراءتها
اعذرينى حبيبتى على التأخير فى التعليق لا تتصورى مدى انشغالى بمذكره بنتى بكره لما حمودى يكبر حتعرفى يعنى ايه مدارس ومذاكره ربنا يكون فى العون
تحياتى لك ولابنك الجميل

dodo, the honey يقول...

هههههههه ..

قرأت القصة باستمتاع !
و أنا أنتظر البقية !
أرجوكِ لا تطيلي علينا !
هيا !

:)

وصف الاحساس يقول...

هبه فاروق

وﻻ يهمك يا اموره المهم اني تطل بس علينا
بيسعدني جدا وجودك وربنا يكون في عونك
والله انا شايله هم حكايه المذاكره دي من دلوقت مع انه لسه فاضل خمس سنين عليها
ربنا يخليلك نيروز يارب ويفرحك بيها
نورتيني يا قمر
تحياتي

وصف الاحساس يقول...

دعاء
شكرا ليكي
تحياتي

ريـــمـــاس يقول...

صباح الغاردينيا وصف
:)
طبعاً أنا جايه ومكسوفة عشان أتأخرت وكمان تضايقت عاوزة اعرف ايه الي شافه احمد اممم اكيد بنت قمر زيك كدا :)
يلا ماتتأخريش عليا في الجزء الجاي عشان انا مسافره وحغيب شويتين وعاوزة اعرف حصل ايه ؟ :)
بجد جزء جميل وحسيت اني معاهم بجد "
؛؛
؛
لروحك عبق الغاردينيا
كانت هنا
reemaas

وصف الاحساس يقول...

ريماس
لا كسوف ولا حاجه يا جميل .. ده انا اجيبلك القصه لحد عندك
وما تضايقيش نفسك ولا حاجه بكره الصبح باذن الله هنزل جزء جديد عشانك بس
نورتيني يا قمر
تحياتي