الأربعاء، 11 أبريل، 2012

في اعدادي هندسه

الصبح الساعه 7.00
ام احمد : احمد .. يلا يا احمد قوم ..وتدور الي السرير الاخر ... هشام يلا يا هشام الساعه 7
احمد : انا مش احمد انا هشام
هشام : وانا مش هشام انا احمد
ام احمد : بطلو دلع يلا وقومو هحضر الفطار مش هنستناكو وهأنزل مش هصحيكو تاني
احمد وهشام : حاضر .. حاضر
ويسحب كل منهما الغطاء علي راسه وتخرج ام احمد تجهز الفطار
بعد ربع ساعه يخرج احمد وهشام من غرفه نومهما ويتجهان للافطار
احمد : صباح الخير
ام احمد : صباح النور .. ايه يا هشام مفيش صباح الخير
هشام : مش احمد قال ... كأني انا قلت بالظبط
ابو احمد : مش هتبطلو الدلع ال انتو فيه ده ... انتو دلوقت كل واحد في كليه ... وكبرتو وبقيتو مسؤلين عن نفسكو .. محدش هيركن علي التاني .. ولا حد هيتحجج بالتاني
هشام : يا حج انت لازم تفكرنا اننا خلاص افترقنا والله خلاص هعيط
احمد : بالحضن يا هشام .. ويقوم الاثنان ويحضننان بعضهما في حركه تمثيليه
هشام : بالحضن يا احمد .. اهئ .. اهئ .. اهئ هتوحشني يا صاحبي
ابو احمد وام احمد يضحكان
ابو احمد : استرجل يا واد منك له بطلو شغل السيما ده .. يلا انا ماشي
الجميع : مع السلامه
ثم تتبعه ام احمد واحمد وهشام كل الي جهته
..
..
احمد وهشام توام يشبهان بعضهما بالمللي مرتبطان ببعض كثيرا ولكن فرقتهما الثانويه العامه حيث دخل احمد هندسه ودخل هشام تجاره ولكنهم عزما الا يفترقا مهما حدث
..
..
اول يوم هندسه
دخل احمد المحاضره الاولي والتي كانت عامره تعرف علي العديد من الزملاء وجلس في بنش ينتظر المحاضره
لحظات واتي الدكتور وبدات المحاضره تلو الاخري والصداع في راس احمد يزداد و بداخله يقول
احمد : زمان هشام هايس وانا لايص .. يعني لو كان معايا دلوقت مش كنا عرفنا نسلي بعض
اخرج موبايله من جيبه وكتب رساله لهشام نصها
" ولا يوم من ايامك يا هشام والله الفرقه صعبه .. زمانك هايص وانا لايص "
وصلت الرساله الي هشام الذي كان يحتسي شاي في كافيتريا الكليه مع زملائه .. فتحها بلهفه فهو يعرف انها من احمد شقيقه وتوامه .. قراها بسرعه وضحك في نفسه وتنهد بحزن وقرر ان يسلي احمد في وحدته ..فطلب رقمه وهو ينتظر سماع صوت اخيه
..
رن هاتف احمد في المحاضره رنه طمني عليك .. قول فين الاقيك .. مشتاق لعنيك .. وبموت من شوقي ليك .. ازاي انا اعيش لو مش وياك
احمد ينظر الي اسم نصفه الاخر بهيام انطلق صوت الدكتور في المحاضره
الدكتور : ايه هنكمل الاغنيه كلها ولا ايه .. ايه الاستهتار ده يا باشمهندس
انتزعه صوت الدكتور من سرحانه وارتبك واغلق الصوت وقال : اسف مخدتش بالي
الدكتور : اخر مره بعد كده مش هخليك تحضر تاني .. ال معاه موبايل يقفله او يخليه سايلنت مش عايز ازعاج
حاول ان يداري احمد ارتباكه واستكمل يومه
...
...
...

في البيت
احمد عاد الساعه 5.00 مساء بينما هشام الساعه 12 .00 :ظهرا عاد الي البيت وتناول الغداء ونام واستيقظ علي صوت احمد عائد من الكليه
هشام : ايه يابني انت خطفوك في الكليه ولا ايه الساعه خمسه
احمد يلقي نفسه علي اول كرسي
احمد : اسكت يا هشام علي ال جرالي انهارده .. ده كله ضرب .. ضرب مفيش شتيمه .. محاضرات .. محاضرات محاضرات ايه ده يا خرابي .. ولا ساعت ما رنيت عليا الدنيا قامت ما قعدتش .. امك فين .. ماما اااااا ..
ام احمد : ايوه يا احمد انت شرفت
احمد : جعااااااان
ام احمد : يا حبيبي يا بني
احمد : من الصبح محاضرات .. دماغي هتنفجر .. ماليش دعوه انا عايز هشام يا ننجح سوا يا نفشل سوا .. عايز احول تجاره


** ال يحب يعلق علي القصه ياريت لو عنده اي ملاحظات يقولها مش بس علي الجزء ده علي ال جاي كمان يعني طريقه العرض الاسلوب الوقفات التفاصيل اي حاجه وشكرا له جدا

وصف الاحساس
تحياتي

هناك 22 تعليقًا:

P A S H A يقول...

هو عاجبني انك دخلتي القصة على طول من غير مقدمات ، حسستينا اننا عايشين معاهم في نفس البيت ، لغة الحوار كمان عفوية وما فيهاش فذلكة حسيت معاها بحميمية جميلة
:)
دمتي مبدعة ومتألقة وفي انتظار الجزء الثاني

ريـــمـــاس يقول...

مساء الغاردينيا وصف
عارفة اجمل حاجة عفويتك في الكتابة بجد حسيت بـ احمد وهشام وخاصة لما كانو بيلعبوا على مامتهم وهي بتصحيهم ههههه يعني حسستيني أننا معاهم وحكاية المحاضرات وشعورهم ببعض جميل اوي لان دا حال التؤام فعلاً القصة جميلة كـ بداية يلا كملي أنا مستنيا الجزء الجاي بس اوعي يحبو بنت وحدة تبقى مصيبة ههههههه"
؛؛
؛
لروحك عبق الغاردينيا
كانت هنا
reemaas

نيللى يقول...

أولاً وحشني كتاباتك كلها :)

ثانياً: القصة فيها جو الدفي بين الأخوات والجو ده مفتقدينو دلوقتي..

استمري في الكتابة!

همسة محبة يقول...

سلمت اناملك كملى لانك تشعرينا انك حقا تتحدثى عن بيوتنا فعلا وتشوقينا الى القراءة وبعدين فين باقى جلسات الطبيب النفسى

د.ريان يقول...

مساء الجمال ياوصف الاحساس

القصة روعة وفيها تشويق انا لم أحس بها حتى أنتهى الجزء
بصراحة يا وصف أنت بتتكلمي عن شيء عميق وهو الأخوة مش عارفين راحت فين أيامها ومعانيها

أحنا بزمن بجد نفتقد فيه الأخوة الطيبة ودا اللي الي أثر بالقصة

أسعدن الصباح هنا ياوصف الاحساس

دمتم بكل ود وتسلم ايدكِ على وجبة المشاعر دي :)

هبة فاروق يقول...

القصه جميله يا وصف ولكن لا مانع ان تبدا بمقدمه لوصف الحاله والزمن والمكان كما يكتب فى اى سيناريو او كما عودنا اى كاتب مثلا كتوفيق الحكيم واذا لم تبدأ فلا مانع فمن خلال الحوار نستطيع ان نعرف الشخصيات والاماكن فأنا استنتجت من خلال كلامك انهم تؤائم ويجلسان فى غرفه المعيشه فلا داعى لذكر ذلك بعد الحوار
القصه فكرتها جميله وبالفعل التؤائم المنفصله يشعرون انهم روح واحده فى جسدين ومن الصعب تفرقتهم ونهايتها واقعيه
استمرى حبييبتى بالتوفيق تسلم الايادى

ظلالي البيضاء يقول...

وصف الإحساس ..
بداية القصة أوحت لي أن أحمد وهشام توأمان قبل أن أصل غلى الجزء الذي ذكرت فيه أنهما توأمان بالفعل ..

كنت من شويا في مدونة نيللي رحت دمعة عيوني ..

لما جيت هنا اضحكت ..

انتوا بتتحكموا بمشاعرنا يا أهل بلوغر وللا إيه .. ههههه

قصة جميلة وعفوية ..
كوني بألف خير ..

رؤى عليوة يقول...

اتأخرت معلش

القصة جميله ومنتظرة البقية
واكيد الجاى هيبقى فيه شوية سيناريو واكشن
لكن اسلوبك جميل سهل ويوصل علطول


دمت بخير

ميمي يقول...

أعجبتني القصة تمثل واقعاً جميلاً
دمت بخير
أختك ميمي
أتمنى ان تزوري مدونتي (خواطر حالمة على ضوء القمر)
http://memi2012.blogspot.com/

وصف الاحساس يقول...

باشا
شكرا ليك جدا ياريت لو في اي ملاحظات بخصوص السرعه في الاحداث او الوقفات او اي شيء تقوله عشان اعدل الاجزاء ال باقيه
سعيده ان الجزء عجبك
نورتني جدا
تحياتي

وصف الاحساس يقول...

ريماس
هههههههههههه ما تقلقيش يا قمر مش هيحبو بنت واحده ولا حاجه
التوائم فعلا بتعمل الحركات دي مع اهلهم وبيتفننو فيها
نورتيني يا قمر
تحياتي

وصف الاحساس يقول...

نيللي
انتي كمان وحشتيني جدا
سعيده ان القصه عجبتك
حاضر هستمر ان شاء الله
نورتيني يا قمر
تحياتي

وصف الاحساس يقول...

همسه محبه
شكرا ليكي يا جميل
الجلسات ما كملتهاش بصراحه حتي مش فاكره ايه ال حصب ما خلانيش اكملها بس ان شاء الله اقراها تاني واكلها باذن الله
نورتيني يا جميل
تحياتي

وصف الاحساس يقول...

د ريان
مشاعر الاخوه مش عارفه ليه معدتش ملموسه انك تركن علي اخوك وانت مطمن انه معاك ... جايز الحاجات ال بنتمناها بنحلم بيها فبتاثر علي الكتابه والاحلام
اسعدني وجودك جدا
مساك زي الفل
نورتني جدا
تحياتي

وصف الاحساس يقول...

هبه فاروق
فهمت قصدك وان شاء الله احاول اعالجها في الباقي
نورتيني يا قمر
تحياتي

وصف الاحساس يقول...

ظلالي البيضاء
من كل بلوج احساس
هو ده حال المدونين يا استاذي
سعيده بوجودك جدا
تحياتي

وصف الاحساس يقول...

رؤي
نورتيني يا جميل
بيسعدني دايما وجودك
ان شاء الله تعجبك
تحياتي

وصف الاحساس يقول...

ميمي
شرفتيني في مدونتي يا قمر
سعيده ان القصه عجبتك
وان شاء الله ازورك قريبا جدا
نورتيني جدا
تحياتي

فشكووول يقول...

ازيك يا وصف الاحساس
والله ياوصف اول يوم فى الجامعه بيبقى يوم تاريخى مش بيروح من الذاكره خالص
احمد بقى فى هندسه وهشام فى تجاره والله عشان هما شكل بعض مش عارف مين اللى فى الهندسه ومين اللى فى التجاره ومين احمد ومين هشام لكن المهم
اللى فى الهندسه لايص عشان كليه عمليه مش لعب زى التجاره مع انى انا تجاره لكن برضه لعب فى لعب
والضرب فى الهندسه فى العمود الفقرى اما فى التجاره بيضربوهم بالورقه .. او على رأى والدتى الله يرحمها بيضربوهم بالغلافه
لكن المهم عشان يبقوا فى كليه واحده لازم بتاع الهندسه اللى انا تهت فيه هو احمد ولا هشام المهم يروح التجاره تبقى خيبه بالويبه
تحياتى

ريبال بيهس يقول...

مساء الورد وصف الاحساس

بصراحة ودون مبالغة القصة رائعة

وهي من النوع السهل الممتنع ابتسمت

ضحكت وأستمتعت ولا أريد أن أنتقد لأن

طريقتك في كتابتها جميلة جداً وقريبة

من القلب ولا تحتاج لأي رتوش ...

بإنتظار الجزء القادم لأنه واضح

جداً ان الأحداث لم تبدأ بعد ..

أعتذر لتقصيري ولكن تحديثاتك لا تصل مدونتي فالعذر منك سيدتي ...

تحياتي وإحترامي

وصف الاحساس يقول...

عمو فشكوول
ازيك يا حج فشكول فينك من زمان محدش شافك
والله تصدق .ماليك عليا يمين
انا بعد ما قريت تعليقك الكريم تهت كده لقيت نفسي مش فاكره مين احمد ومين هشان وايه ال دخلهم الكليه وايه علاقتهم ببعض اصلا وبعد ما رجعت قريت القصه تاني قلت الحمد لله اني كتبتها للاخر احسن ما كنتش عرفت اكملها خالص .. ايه يا عمو التوهان ده ربنا يكون في عونك
تحياتي

وصف الاحساس يقول...

ا ريبال
سعيده ان القصه عجبتك وسعيده اكتر بوجودك مره اخري
فعلا البلوجر الفتره الاخيره كان بيضيع مني تحديثات اكتر المدونات بس الحمد لله اكتشفت عملته مبكرا
المهم انك نورت المدونه مره تانيه
تحياتي