الأحد، 14 فبراير 2010

حد يقولي كلمتين حلوين ..!!!

كل واحد بتيجي عليه ايام ...بيحس انه محتاج حد اوي

ونفسة يشوفه اوي .....ونفسه يكلمه اوي

خصوصا قبل ما ينام ....بس مش عارف مين

عايز حد يقوله كلمتين حلوين

حاسس انه عطشان اوي ...وجعان اوي

بس مش لاكل ولا لشرب

عطشان حب وحنان ....محتاج كلمة حلوة

مسج في نص الليل تقولك

بحبك وحشتني ......مكالمة من رقم غريب

حد يقولك مش عارف انام من غير ما اسمع صوتك

احساس غريب بالحب من غير طرف تاني

جوع عاطفي

حب واشتياق للا احد

زي ما بيقولو عاشق وانا مالي حبيب

كتير اكيد حس الاحساس دة

وكتير احتارو يملو الفراغ ده ازاي

من غير لا عيب ولا حرام

مش لازم نعمل حاجة غلط عشان نملا بيها فراغنا

بس ممكن احنا نملا فراغنا بنفسنا

ممكن كل واحد يقول لنفسه كلمتين حلوين

يروي عطشة و يجبر بخاطره

ال اكيد مشتاق ....ومش قادر يصبر

زمان كنت بقول كدة ..

بس عمر الكلمتين ال الواحد بيقولهم لنفسه كانو بيعملو حاجة

معرفش ايه الحل في الحكاية دي

يمكن الجوع العاطفي ال بس مشتاق للحبيب مقدور عليه انما

في حب تاني صعب تنفعه الكلمتين الحلوين

صعب اما تحتاج اخ او ام او اب وما تلاقيش

يعوض مكانهم كلمتين منك ليك

ولا من اي حد تاني

الحب مش بس للحبيب انما في حب الاصل الطبيعي

ال منه بنقدر نلاقي طريق للحب الجديد

وصف الاحساس
تحياتي


هناك 7 تعليقات:

سمع هوص (Abo 3li) يقول...

روحي شغلي عبدالحليم حافظ... وتخيلي انه بيغنيلك انتي...
انا عن نفسي بشغل انغام...


وفعلا حب الاهل عمره مبيتعوض.. ولا بيبقي له زي...

بوست مؤثر وجميل... ولوا خايف تفهميني غلط كنت قلتلك كلمتين حلوين(وش مطلع لسانه)...


تحياتي

سمع هوص (Abo 3li) يقول...

التعليق الاول برضو...
واخدة بالك؟؟؟
مش هتنازل المرة دي عن جايزة... مليش دعوة

Unknown يقول...

اقرى رومنسيات هى حل موقت بس يتحسن الحالة

وصف الاحساس يقول...

سمع هوص
( وش مكسوف ) خلاص معدتش محتاجة عبد الحليم و انغام بقي في حد بيقولي كلمتين حلوين
الدور والباقي عليكو انتو
نورت البوست واصحاب البوست
( وش بيطلع لسانه ) وخلي الكلمتين الحلوين بتوعك ليك انا عندي
وبعدين مش قلتلك ان اصلا محدش كان بيعلق عندي
انا ال المفروض اخد جايزة اني خليت حد يقرالك وياخد اول تعليق كمان
كدة ليا عندك اتنين
نورتني
تحياتي

وصف الاحساس يقول...

العيسوي الصغير
انا خلاص بطلت الحاجات دي
انتو بقي شوفي هتعملو ايه
نورت البوست
تحياتي

Tamer Nabil Moussa يقول...

كلامك صح العاطفة والاحساس والشعور بيها مهمة واحتياج لكل انسان لاغنى عنة


مع خالص تحياتى

وصف الاحساس يقول...

الاستاذ تامر
للاسف الانسان دايما محتاج
حتي لو عنده كل حاجة دايما بيدور علي شئ ناقص
بس النقص في الشعور مش بيعوضه اي احساس بالشبع من اي حاجة تانيه
ودايما بتفضل الروح تايهة كانها طفل ضاعت منه امه ومش قادر يمشي تاني
تحياتي